Meirihluti nefndarinnar kynnti breytingartillögur sínar við fjárlagafrumvarpið í gærdag. Þar er gert ráð fyrir að tekjur hækki um 4,2 milljarða króna, og heildartekjur ríkissjóðs verði rúmir 755 milljarðar króna. Útgjöld ríkissjóðs á næsta ári verða tæpir 690 milljarðar króna miðað við breytingartillögurnar, sem er hækkun upp á tæpa níu milljarða miðað við fyrirliggjandi fjárlagafrumvarp. Þá er nú gert ráð fyrir 10,7 milljarða afgangi í ríkisrekstrinum, en fjárlagafrumvarpið gerði ráð fyrir 15,3 milljarða afgangi. Afgangurinn lækkar því um 4,6 milljarða miðað við fjárlagafrumvarpið.
\"Stóra myndin er góð. Við erum með hallalaus fjárlög, við erum að lækka skuldir, við erum að setja peninga í grunnþjónustu og það eru góðu fréttirnar. Það sem okkur finnst hins vegar ekki ganga nógu vel er að forgangsraða og ná tökum á ríkisrekstrinum,“ sagði Guðlaugur Þór Þórðarson, varaformaður fjárlaganefndar, í samtali við fréttastofu RÚV í gær.
Fram kom í fréttinni að tillögur meirihluta fjárlaganefndar gera meðal annars ráð fyrir einum milljarði króna í málefni hælisleitenda og flóttafólks, 850 milljónir króna fara í að stytta biðlista í heilbrigðiskerfinu og 490 milljónir renna til uppbyggingu innviða á ferðamannastöðum.
Þá er gert ráð fyrir 400 milljónum til að efla almenna löggæslu, 250 milljónum til aðgerða í loftslagsmálum og 280 milljónum til kaupa á lyfi við lifrabólgu c. Húsafriðunarsjóður fær 150 milljónir, sama upphæð fer til ferðamálarannsókna og 75 milljónum króna verður varið til gestastofu Vatnajökulsþjóðgarðs. Um 400 milljónir fara til hafnarframkvæmda og uppbygging á innanlandsflugvöllum fær sömu upphæð. Vegagerðin fær 235 milljónir króna, Fjarskiptasjóður 200 milljónir og 100 milljónir renna til heilbrigðisstofnana.
Fjárframlag ríkissjóðs til Lánasjóðs íslenskra námsmanna lækkar um 490 milljónir og til atvinnuleysistryggingasjóðs um 350 milljónir.
Breytingartillögum meirihluta fjárlaganefndar við fjárlagafrumvarpið verður dreift á þingi síðar í dag, og verða í framhaldinu birtar á vef Alþingis.
