Fjárlagafrumvarp fyrir árið 2020 var kynnt í morgun. Samkvæmt því munu 400 milljónir króna renna í stuðningsgreiðslur við einkarekna fjölmiðla á næsta ári. Auk þess aukast framlög ríkisins til RÚV um 190 milljónir króna á næsta ári. Kjarninn greinir frá.
Af þessum 400 milljónum eiga 50 milljónir króna að renna til textunar og talsetningar. Fjölmiðlafrumvarp Lilju Alfreðsdóttur mennta- og menningarmálaráðherra hefur verið afgreitt úr ríkisstjórn þó hún eigi enn eftir að mæla fyrir því á Alþingi.
Til viðbótar við 350 milljón króna greiðslu vegna beinna styrkja til einkarekinna fjölmiðla eru áform um að styðja við þá fjölmiðla með stuðningi sem nemur allt að 5,15 prósent af launum starfsfólks á ritstjórn, sem fellur undir lægra skattþrep tekjuskattsstofna. Umfang þeirrar aðgerðar er metið 170 milljónir króna.
Útvarpsgjaldið hækkar um 2,5 prósent milli ára og áætlaðar tekjur RÚV vegna þeirra aukast um 190 milljónir króna. Áætlað er að útvarpsgjaldið verði 4.780 milljónir króna á næsta ári.
