Breskir stjórnmálamenn og iðnjöfrar hafa áhyggjur af umsvifum vogunarsjóða, sem kaupa hlutabréf, skuldabréf og annars konar kröfur við lágu verði en krefjast fullrar greiðslu. Um þetta má lesa í Daily Mail í dag, þar sem verið er að fjalla um Paul Singer og son hans Gordon; mennina að baki Elliott Advisors. Feðgar þessir svífast einskis til að innheimta að fullu kröfur sem þeir hafa keypt á slikk.
Ríkisstjórn Argentínu fékk að kenna á þeim 2012 þegar þeir nýttu sér dómskerfið í Ghana til að kyrrsetja herskip úr flota Argentínu sem var í heimssókn. Það tók ríkisstjórn Argentínu tvo mánuði að losa skipið. Feðgarnir voru að innheimta kröfu á hendur Argentínu sem þeir höfðu keypt á 117 milljónir dollara 2001, þegar efnahagur landsins var í rúst. Nettó hagnaður Singer feðganna af þessum kröfum var 2,3 billjónir dollara.
Eftir efnahags- og bankahrunið á Íslandi í október 2008 keyptu vogunarsjóðir kröfur á föllnu viðskiptabankana þrjá. Ríkisstjórn Jóhönnu Sigurðardóttur taldi ekki rétt að þessir aðilar sætu bara uppi með fjárfestingu sína sem kröfuhafar á hendur slitabúum föllnu bönkunum heldur ákvað að þeir ættu sérstakan rétt á hendur nýju ríkisbönkunum þremur. Gerðir ríkisstjórnar Jóhönnu Sigurðardóttur sumarið 2009 leiddu til þess að vogunarsjóðir eignuðust Íslandsbanka hf og Arionbanka hf. Vogunarsjóðirnir kusu að skila Íslandsbanka hf þegar ríkisstjórn Sigmundar Davíðs tók að þrengja að þeim og samið var við eigendur Arion banka hf. Ríkisstjórn Katrínar Jakobsdóttur gerði ekkert til að vernda hagsmuni Íslands gegn vogunarsjóðum sem náðu Arion banka undir sig 2009 og eiga hann nú og geta skrúbbað hann að innan.
Fjárhagslegir hryðjuverkamenn hafa lifað fínu lífi á Íslandi frá hruni studdir af stórum sem litlum lögmannsstofum sem talið hafa mannréttindi þeirra brotin með því að fá ekki að ganga fjárhagslega frá einstaklingum, fjölskyldum og fyrirtækjum.
