Ferðafólk á fólksbíl sat fast inni á milli tveggja aurskriða sem féllu á Siglufjarðarveg utan við Strákagöng í gærkvöld, en mikið vatnsveður gekk yfir svæðið í gær og í nótt og var Hvanneyrarbrautin á Siglufirði sem fljót yfir að líta um tíma.
Samkvæmt upplýsingum lögreglunnar á Akureyri var fólkinu komið til bjargar og fékk það gistingu í nótt, en starfsmenn Vegagerðarinnar munu kanna aðstæður með morgninum og opna veginn á ný en hægt er að komast frá Siglufirði um Héðinsfjarðargöngin og Ólafsfjörð. Áður en Héðinsfjarðargöng komu þá hefði þetta þýtt að leiðin til Siglufjarðar væri ófær en svo er ekki nú.
Mikið vatnsveður hefur gengið yfir landið síðustu daga og er þess skemmst að minnast að fjöldi ferðafólks varð að leita sér aðstoðar á Seyðisfirði fyrr í vikunni eftir að tjaldstæði bæjarins var umlukið vatni.
Vatnsveðrið nær þvert yfir landið, en vegurinn norðan Bjarnafjarðar á Ströndum er lokaður vegna skriðufalla og vatnavaxta, samkvæmt upplýsingum frá Vegagerðinni.
Veðurstofa Íslands gaf í gær út viðvörun vegna mikillar úrkomu gengur nú yfirr landið norðan- og austanvert og á að haldast fram á kvöld. Sérstaklega er varað við úrkomu á norðanverðum Ströndum og norðanverðum Vestfjörðum en þar gæti skriðuhætta aukist. Búast má við verulegu afrennsli á norðanverðu landinu og frá jöklum miðhálendisins. Ferðafólk er hvatt til að gæta varúðar.
Spáð er norðan og norðaustan hvassviðri norðvestan og vestan til fram eftir degi og með því er von á snörpum vindhviðum við fjöll. Einnig er von á mikilli rigningu á Ströndum til hádegis.
Veðurspá fyrir næsta sólarhring er annars á þennan veg: Norðaustlæg átt, 13 til 20 m/s norðvestan- og vestan til, en 5 til 13 annars staðar. Víða súld eða rigning, en úrkomulítið sunnan- og suðvestanlands. Mikil rigning á Ströndum fram undir hádegi. Fer að draga úr vindi norðvestan til á landinu eftir hádegi og léttir frekar til á Suðvestur- og Vesturlandi. Hiti 10 til 16 stig sunnan heiða, en 3 til 10 stig fyrir norðan.
