Fjármálaráðherra, forsætisráðherra, forseti Alþingis og skrifstofa forseta Íslands, í valdatíð Ólafs Ragnars Grímssonar. fengu bréf frá kjararáði áður en ákvörðun var tekin um launahækkanir til handa þingmönnum, ráðherrum og forseta. Sá hængur er á, að bréfið var sent í október í fyrra. Morgunblaðið greinir frá þessu.
„Í ákvörðun kjararáðs sem birt var 29. október síðastliðinn kemur fram að forsætisráðherra, fyrir hönd ráðherra í ríkisstjórn Íslands, segi í svari sínu til ráðsins ekki viðeigandi að hlutast til um eigin kjör eftir atvikum með því að koma á framfæri sjónarmiðum sínum við kjararáð,“ segir í Morgunblaðinu.
Þar segir einnig: „Ráðherra meti það svo að megintilgangur laga um kjararáð sé að færa ákvarð- anir um kjör æðstu embættismanna undan áhrifavaldi þeirra sjálfra og að gild rök liggi þar að baki. Biðst hann því undan því að tjá sig um málið. Þá sagði forseti Alþingis meðal annars í svari sínu til kjararáðs að eftir samráð við forsætisnefnd Alþingis mundi forseti ekki tjá sig um launakjör alþingismanna enda teldi hann að kjararáð hefði þær upplýsingar sem nauðsynlegar væru til að kveða upp nýjan úrskurð. Hann væri þó tilbúinn að veita ráðinu allar þær upplýsingar sem óskað væri sérstaklega eftir. Fjármála- og efnahagsráðuneytið svaraði einnig kjararáði þar sem segir að ráðuneytið telji eðlilegt að kjararáð horfi á þá launaþróun sem verið hafi við athugun á því hvort endurmeta eigi laun þjóðkjörinna manna og ráðherra og gæti jafnræðis við töku ákvarðana. Athygli vekur hins vegar að ekkert svar virðist hafa borist frá embætti forseta Íslands en embættinu var sent bréf á sama tíma og öðrum umsagnaraðilum. Á þessum tíma, 8. október 2015, gegndi Ólafur Ragnar Grímsson embætti forseta Íslands og hafði Guðni Th. Jóhannesson því ekki aðkomu að málinu á þessu stigi.“
