Þrátt fyrir að vera aðeins 24 og 25 ára gömul hafa Hilmar Orri Jóhannsson og Elín Gunnarsdóttir verið par í meira en áratug og eiga tveggja ára dóttur.
Þau segja ástarsögu sína í Helgarblaði Fréttablaðsins en einnig frá tíðindum hræðilegu sem þau fengu í fyrra, þegar lífið blasti við þeim og ungri dóttur þeirra.
Þau höfðu verið á árshátíð hjá nemendafélagi tannlæknanema en daginn eftir barði vondur gestur að dyrum.
„Við skemmtum okkur ótrúlega vel, svo vakna ég á laugardegi og held ég sé bara þunnur, er að drepast í maganum og með höfuðverk. Ég tók verkjatöflur og var ekkert að skána, versnaði bara,“ segir Hilmar í viðtalinu. Hann langaði ekki á bráðavaktina vegna þynnku en Elín sannfærði hann enda gat hann hvorki legið á maganum, hliðinni eða bakinu og átti einnig erfitt með að standa uppréttur.
Á bráðamóttökunni fékk Hilmar þó ekki góðar móttökur. Hann var geymdur á ganginum og þurfti að biðja um skilrúm. Að lokum var hann sendur í ómskoðun og fékk að fara heim að því loknu.
„Svo er ég kallaður bara inn á skrifstofuna á sunnudeginum og þau sögðu að ég væri með túmor. Ég spurði: Túmor? Hvað þýðir það? Þá fékk ég að vita að þetta væri svolítið stórt æxli, átta sentímetra, í kviðarholi fyrir aftan þarmana,“ segir Hilmar. Svo hafi þau þurft að bíða nánari greininga.
„Á mánudeginum mætum við í viðtal og konan sem tók viðtalið segir okkur að ég sé með krabbamein eins og hún sé að segja mér veðurfréttir: Þú ert með krabbamein, þú ert að fara að leggjast inn á deildina í dag, taktu með þér tannbursta. Þetta er illkynja krabbamein, örugglega eistnakrabbamein, við erum ekki alveg hundrað prósent, þú ferð í aðgerð á morgun og svo byrjarðu í lyfjameðferð.“
Ástar- og átakasögu þeirra Hilmars og Elínar má lesa hér í heild.
