Brýnustu verkefni stjórnvalda eru að bæta lífskjör barna einstæðra foreldra, sem oftast eru mæður, og barna örorkulífeyrisþega. Staðan á húsnæðismarkaði hefur veruleg áhrif á lífskjör barna, sérstaklega barna einstæðra foreldra og öryrkja. Þetta eru meðal meginniðurstaðna nýrrar skýrslu Velferðarvaktarinnar um lífskjör og fátækt barna á Íslandi 2004-2016, sem er greint frá í frétt Öryrkjabandalags Íslands.
Yfir sex þúsund fátæk börn búa hér á landi, eins og Sara Elísa Þórðardóttir þingmaður Pírata vakti athygli á í ræðu sinni í morgun á Alþingi.
Fram kemur í ágripi skýrslunnar á vefsvæði Velferðarvaktarinnar að heilt yfir sé staðan ágæt í íslensku samfélagi samanborið við flest önnur Evrópulönd. „Það bendir til þess að vandinn sé ekki óyfirstíganlegur ef grípa á til aðgerða til að draga úr fátækt á meðal barna,“ segir í skýrslunni.
Samt sem áður séu alvarleg óleyst vandamál sem þarf að taka á. Þá kemur fram að ekkert bendi til þess að stjórnvöld hafi lagt sérstaka áhersla á að vernda börn á Íslandi fyrir áhrifum kreppunnar né heldur að það hafi verið reynt að bæta lífskjör barna í gegnum tæki fjölskyldustefnunnar þegar hagur þjóðarbúsins fór að vænkast.
Lífskjör barna eftir að kreppunni lauk hafa batnað og skýrist það að stærstu leyti af vaxandi atvinnutekjum heimila þeirra eftir að uppsveiflan hófst á ný. Aftur á móti segir í skýrslunni að þróun félagslegra greiðslna á borð við barnabætur, fæðingarorlofsgreiðslur og húsaleigubætur hafi unnið á móti batanum.
Í frétt ÖBÍ er bent á að kaupmáttur örorkulífeyristekna hefur staðið í stað eða jafnvel rýrnað undanfarinn áratug og að það hafi ekki haft góð áhrif á börn öryrkja.
