"Alþingi hefur verið án kjölfestu síðan krónan hrundi síðast. Það ástand hefur endurspeglast afar skýrt í tveimur annars ólíkum ríkisstjórnum. Þótt ýmislegt hafi áunnist í tíð þeirra beggja finna allir fyrir rótleysinu innan þings sem utan."
Á þessa leið skrifar Þorsteinn Pálsson í nýjasta pistli sínum á hringbraut.is. Þar veltir hann því fyrir sér hvort mikil fylgisaukning Pírata á Íslandi sé bóla eða endurspegli raunverulegar breytingar á pólitíkinni hér á landi. "Rætur stöðugleika hafa víðast hvar í lýðræðisríkjum legið í því að einn eða tveir flokkar hafa notið trausts til þess að mynda pólitíska kjölfestu," bendir hann á og segir Sjálfstæðisflokkinn lengi hafa gegnt þessu hlutverki hérlendis, en nú sé það breytt. Þótt fylgið við Pírata geti reynst hverfult er hitt alls ekki óhugsandi að þar sé að myndast ný kjölfesta í íslenskri pólitík. "Og kannski er það beinlínis líklegt," hnykkir Þorsteinn á.
"Álitamálin eru eigi að síður margvísleg," skrifar Þorsteinn áfram og metur stöðuna: "Píratar eiga nú þrjá þingmenn. Fáir vita með vissu fyrir hvað þeir standa. Vel má líka vera að þeir viti það ekki svo gjörla sjálfir. En út frá hinu má ganga sem vísu að þingmennirnir þrír viti ekki meir en við hin um raunverulegar pólitískar hugmyndir þess mikla fjölda fólks sem lýsir yfir stuðningi við þá. Margt er vitaskuld á huldu um skoðanir þessarar nýju kjölfestu í pólitíkinni. Um hvað er þessi hópur fólks sammála? Hvert vill hann stefna? Er hann í leit að meira pólitísku raunsæi? Eða vill hann heldur heyra það sem lætur vel í eyrum á líðandi stundu?"
Þorsteinn veltir fyrir sér hvaða áhrif aukið fylgi Pírata muni hafa á aðra flokka: "Það er mikil pólitísk áskorun að nálgast þennan hóp kjósenda og leita svara við þessum spurningum og mörgum öðrum. Ætla hinir flokkarnir til að mynda að breyta stefnu sinni til að svara kalli þessa hóps? Eða sitja þeir við sinn keip?"
