\"Áhættufjárfestar geta grætt mikið á Íslendingum sem eru reiðubúnir að greiða himinháa vexti af krónum meðan vextir eru nálægt núllinu annars staðar,\" segir Þorsteinn Pálsson í nýjum pistli sínum á hringbraut.is sem fjallar um hríðskotahækkanir vaxta hér á landi og afleiðingar þess.
Hann segir að enginn hafi hrokkið í kút þegar Seðlabankinn hafi hækkað vexti á dögunum, enda hafi hann ítrekað skotið af aðvörunarfallbyssum sínum af ótta við að launahækkanir yrðu umfram verðmætasköpun í landinu. En nú beri nýrra við; bankinn boði að á næstu misserum verði hleypt af öllum þeim hriðskotabyssum vaxtahækkana sem hann eigi í vopnabúri sínu. \"Þetta eru vatnaskil í þróun eftir hruns áranna,\" skrifar Þorsteinn.
Ástæðuna segir hann ekki aðeins tengjast launahækkunum - og nefnir tvennt til viðbótar: \"Annað er að ríkisstjórnin ákvað að bæta í þensluna með ófjármögnuðum aðgerðum í ríkisfjármálum í tengslum við kjarasamningana. Hitt er hættan á að óvarlega verði farið með verðlausu froðukrónurnar sem losna við slit þrotabúanna.\"
Hann spyr hvort vaxtamunarviðskipti fyrirhrunsáranna muni nú endurtaka sig: \"Ríkisstjórnin er búin að lofa að hvorki kjarasamningarnir né samningar hennar við kröfuhafa föllnu bankanna muni rýra verðgildi krónunnar. Vaxtamunarviðskipti gætu til skamms tíma hjálpað ríkisstjórninni að efna það loforð. En vandinn er að þau eru ósjálfbær. Líka má kalla þau eitrað peð. Fari þau af fullum krafti af stað styrkist krónan í byrjun en fall hennar er síðan óumflýjanlegt. Það er bara spurning um tíma,\" skrifar Þorsteinn og veltir fyrir sér uppgangi nýs froðuhagkerfis: \"Ríkisstjórnin þarf nefnilega að svara því núna hvort hún hyggst bregðast við með nýjum höftum. Ef ætlunin er að hafa uppi varnir er vandséð að það verði gert með öðrum hætti. Pólitíski vandinn er aftur á móti sá að spurningunni þarf að svara beint í kjölfar birtingar á áætlun um afnám hafta.\"
