Bjarkey Olsen Gunnardóttir, þingmaður VG, spurði framsóknarmenn spurninga þegar hún flutti þingræðu undir liðnum Störf þingsins á Alþingi í dag.
Hún ræddi skýrslu Bændasamtakanna sem styður við niðurstöðu skýrslu Samkeppniseftirlitsins um dagvörumarkaðinn, sem kom út í mars 2015. Þar kemur fram að styrking krónunnar hafi ekki skilað sér í lækkandi vöruverði. Þar kom einnig fram að vísbendingar séu um að álagning innlendra birgja og dagvöruverslana á innfluttum vörum hafi hækkað og vitnaði Bjarkey til þess.
Hagstæð gengisþróun skili sér ekki til neytenda.
„ASÍ komst líka að þeirri niðurstöðu að við breytingu á vörugjöldum og virðisaukaskatti hefði verð á raftækjum og byggingarvörum ekki lækkað í samræmi við lækkun gjaldanna og hið sama á við um afnám svokallaðs sykurskatts,“ sagði Bjarkey. Gagnrýni þessi hefur áður komið fram úr fleiri áttum, að þegar ríkið afsali sér tekjustofnum í því skyni að lækka álögur á neytendur hagnist einkaaðilar aðallega á breytingunni.
Árið 2014 margfaldaðist innflutningur á nautakjöti til Íslands, magntollar lækkuðu um tvo þriðju og heimsmarkaðsverð lækkaði.
„Engu að síður hækkaði verð á nautahakki um 15% til neytenda á Íslandi. Framsóknarflokkurinn stóð að hækkun matarskatts og niðurfellingu á sykurskatti þar sem mótvægisaðgerðirnar í formi barnabóta og vaxtabóta áttu m.a. að koma á móti en gengu svo til baka að stærstu leiti vegna þess að viðmiðunarmörk fjárhæða voru ekki hækkuð. Á sama tíma eru skýr merki um fákeppni á matvörumarkaði á Íslandi þar sem er arðsemi eigin fjár stærstu fyrirtækjanna er 35–40% samanborið við 11-13% í Bandaríkjunum og Evrópu. Ísland og Noregur eru fremst meðal Evrópuþjóða þegar kemur að lítilli notkun sýklalyfja í landbúnaði. En á móti kemur að bændur þurfa hærra verð fyrir vörur sínar. Hvað finnst framsóknarmönnum um þessa niðurstöðu? Eru þeir sáttir og telja þeir enn að mótvægisaðgerðirnar hafi skilað sér?“
Spurði þingmaðurinn en fékk engin svör frá framsóknarþingmönnum.
