Birgir Örn Birgisson, faðir Einars Arnar Birgissonar sem viðskiptafélagi hans og lögmaður, Atli Helgason myrti í Öskjuhlíð í nóvember árið 2000, kveðst vera tilbúinn að hlusta á Atla Helgason, morðingja sonar síns, vilji Atli tjá sig við hann um voðaverkið.
Þetta sagði hann í viðtali í Íslandi í dag á Stöð 2 í gærkvöld, en í fréttum stöðvarinnar kom jafnframt fram að fjölskylda Einars ætli að senda yfirlýsingu til Lögmannafélagsins og lýsa yfir áhyggjum sínum yfir því að Atli sækist eftir að fá málflutningsréttindi á ný. Til þess þarf uppreist æru og fleklaust mannorð sem hægt er að fá í tilviki Atla fimm árum eftir fullnustu dóms.
Birgir Örn sagði í þættinum að það yrði forvitnilegt að heyra hvað Atli hefði að segja, vildi hann á annað borð ræða við fjölskylduna sem hefur ekki heyrt frá honum eftir að í ljós kom að hann hefði banað Einari.
Aðspurður sagði Birgir að fjölskyldan hefði aldrei velt fyrir sér hvort Atli myndi reyna að fá uppreist æru og sækjast eftir málflutningsréttindum á ný. Nefndi hann þó að á meðan á réttarhöldunum yfir Atla stóð hefði hann lagt inn réttindi sín og hefði það verið talið honum til málsbóta.
Fjölskyldan hefur sem fyrr segir ekkert heyrt frá Atla en sagðist Birgir hafa haft fregnir af honum þegar hann var að hefja afplánun og hafi hann verið síkvartandi. Sagði hann aðspurður að sér fyndist ekkert óeðlilegt að Atli hefði í einhverri mynd reynt að sýna iðrun: \"Mér sýnist hans dómgreind og siðferði óbreytt,“ sagði Birgir. Benti hann einnig á að fengi Atli málflutningsréttindi sín á ný gæti hann orðið dómari og leist honum ekki vel á það.
