Eyþór Arnalds, borgarfulltrúi Sjálfstæðisflokksins, hefur kvatt borgarstjórn eftir fjögur ár í starfi. Síðasti fundur fráfarandi borgarstjórnar fór fram á þriðjudaginn og minntist Eyþór starfsins með ljóðrænni færslu sem hann birti á Facebook.
„Borgarstjórn kvödd.
Sum eru hungruð
sum er södd
Borgin er fögur - og nóttin er ung.“
Með færslunni lét Eyþór fylgja nokkrar myndir frá fögnuði fráfarandi borgarstjórnar og af myndunum að dæma virðist hafa farið einkar vel með þeim Eyþóri og Degi B. Eggertssyni, borgarstjóra, þótt þeir hafi nú ekki alltaf verið sammála í pólitíkinni.
Nú standa yfir meirihlutaviðræður í borginni á milli Framsóknar, Samfylkingar, Viðreisnar og Pírata. Eyþór Arnalds ákvað að gefa ekki kost á sér í nýgengnum sveitastjórnarkosningum og ætlar að hætta í pólitík til að sinna fjölskyldunni og sínum eigin hugðarefnum.
