Raungengi evru gagnvart krónu hefur ekki verið lægra síðan vorið 2008 sem merkir með öðrum orðum fyrir Íslendinga að hlutfallslegur launakostnaður hér á landi fer hækkandi.
Samkvæmt útreikningum Yngva Harðarsonar hagfræðings, sem gerðir voru að beiðni Morgunblaðsins, hefur raungengi evru og þeirra mynta sem hún var upphaflega sett saman úr verið að meðaltali 134 krónur síðan 1972. Raungengi evru gagnvart krónu þarf því að veikjast um 8% til að meðaltalinu sé náð.
Gengi krónunnar hrapaði við efnahagshrunið. Það hafði áhrif á sögulegt meðaltal raungengis evru gagnvart krónunni. Gengi krónunnar er sögulega séð enn veikt. Þessi þróun, ásamt launahækkunum, hefur í för með sér að hlutfallslegur launakostnaður fer hækkandi, að því er fram kemur í Morgunblaðinu í dag.
