27. mars síðastliðinn birti bæjarstjórinn á Akureyri, Eiríkur Björn Björgvinsson, færslu á facebook þar sem hann sagðist hafa sótt páskadagsmessu í Akureyrarkirkju. Hann hrósaði sérstaklega predikun sóknarprestsins.
Í dag upplýsti Ríkisútvarpið að Eiríkur Björn væri að íhuga mjög alvarlega að gefa kost á sér til embættis forseta Íslands og verður þar með númer 15 í röðinni. Í samtali við Hringbraut segir Eiríkur Björn: \"Við erum að skoða málið af alvöru en ákvörðun hefur ekki verið tekin. Þetta er stór ákvörðun og þá ekki síst að hugsa sér að flytja.\"
Í samhengi við síðustu facebook-færslu bæjarstjórans má rifja upp að Ólafur Ragnar Grímsson fór að ræða trúmál og sækja kirkjulegar athafnir þegar hann bauð sig fram en hafði fram að því verið veraldlega sinnaður. Nokkuð hafði verið að honum sótt vegna trúleysis á Guð fyrir kosningarnar. Í blaðaviðtali nokkrum árum fyrir kosningar sagði Ólafur Ragnar: \"Ég tilheyri þjóðkirkjunni eins og flestir, en þrátt fyrir það er ég nokkuð sannfærður um að Guð sé ekki til,\" og vakti skelfingu hjá sumum.
Vantrú rifjaði upp skömmu eftir kosningarnar 1996 að fræðimenn voru kallaðir til að greina hvort forseti Íslands mætti ekki trúa á Guð. Voru svör flest á þá leið að forseti mætti a.m.k. ekki gera neitt sem stríddi gegn íslensku þjóðkirkjunni. Á vefnum vantru.is segir þetta um málið á sínum tíma:
\"Í umræðunni um þetta var meðal annars Gunnar G. Schram, lagaprófessor og sérfræðingur á sviði stjórnskipunar, spurður út í það hvort það gæti nokkuð gengið að hafa trúlausan forseta. Þetta var svar Gunnars: \"Það er raunverulega ekki hægt að krefjast annars af forsetanum en að hann gangi ekki gegn hagsmunum þjóðkirkjunnar. Honum ber samkvæmt 62. grein stjórnarskrárinnar að styðja og vernda þjóðkirkjuna. Þetta eru skyldur sem þjóðhöfðinginn hefur af því að hann er hluti af ríkisvaldinu. Ég tel að það gengi ekki að hann tæki virkan þátt í öðrum trúarsöfnuðum eða mælti gegn þjóðkirkjunni. Þá væri hann farinn að brjóta embættisskyldur sínar.”
Gunnar var einnig spurður að því hvort forseti sem segði frá því að hann trúði ekki á guð væri með því að “vinna gegn þjóðkirkjunni”: \"Þetta er matsatriði. Honum ber samkvæmt þessu atriði að styðja og vernda þjóðkirkjuna. Ef hann segist vera trúlaus jaðrar við að hann sé að lýsa vanþóknun sinni á þjóðkirkjunni og þar með jaðrar við að hann sé farinn að brjóta þetta ákvæði og þar með vanrækja embættisskyldu sína. Það er hins vegar ekki beinlínis hægt að banna honum að gefa yfirlýsingar um trúleysi vegna þess að við höfum í stjórnarskránni ákvæði um trúfrelsi. Það er að sjálfsögðu munur á hvort forsetinn heldur trúleysi sínu fyrir sig og segir engum frá því eða hvort hann lýsir yfir trúleysi í ræðu og riti. Ég tel því að yfirlýsingar forsetans um trúleysi myndu ganga gegn þessu ákvæði.\"
Samkæmt þessum sérfræðingi þýðir ríkiskirkjuákvæði stjórnarskrárinnar að forseti getur einungis verið trúleysingi ef hann heldur kjafti um trúleysi sitt. Trúleysingjar eru því annars flokks borgarar þegar kemur að forsetakosningum. Svo heppilega vildi til fyrir trúlausa forsetaframbjóðandann að hann tók trú fyrir kosningar og vann kosningarnar,\" sagði á vef Vantrúar á sínum tíma.
Engum sögum fer af sinnaskiptum hjá Eiríki Birni, vel kann að vera að bæjarstjórinn sé að jafnaði kirkjurækinn. Hitt liggur fyrir að erfiðara er fyrir mann sem segist hvorki trúa á Guð né sækir kirkju að verða forseti Íslands en ella. Kannski er samband milli þess og síðustu færslu bæjarstjórans á facebook áður en upplýst var í fjölmiðlum að hann bæri hug til Bessastaða. -BÞ
