Ólafur Ísleifsson, þingmaður Miðflokksins, segir verulegan kynjahalla í grunnskólum kalla á skýringar og aðgerðir, í nýjum pistli í Morgunblaðinu í dag.
Þingmaðurinn sendi fyrirspurn á Lilju Alfreðsdóttur, mennta- og menningarmálaráðherra, um námsárangur pilta og stúlkna í skólakerfinum og fékk svör í liðinni viku þar sem fram kom að frammistaða grunnskólastúlkna sé að jafnaði betri en drengja í öllum námsþáttum.
Sömuleiðis eru talsvert fleiri konur sem ljúka stúdentsprófi og háskólanámi.
Staða drengja hefur löngum verið til umræðu, bæði á netheimum og á Alþingi. Átta þingmenn Samfylkingarinnar hafa til að mynda lagt fram þingsályktunartillögu á Alþingi um að mennta - og menningarmálaráðherra undirbúi og leggi fram aðgerðaáætlun til að styrkja stöðu drengja í skólakerfinu.
Sjá einnig: „Enn bullar ráðherra menntamála“
„Stúlkum virðist almennt ganga að mörgu leyti vel í skólakerfinu og er það gleðiefni. En svara þarf hvers vegna árangur drengja er áberandi lakari. Er þetta það jafnrétti sem við sækjumst eftir?“ spyr Ólafur og bætir við að hann telji að slíkur halli yrði ekki látinn viðgangast ef hann væri stúlkum í óhag.
Segir hann ráðherrann ekki bjóða marktæk úrræði til að efla hag drengja í skólakerfinu í menntastefnu fyrir árin 2010-2030.
„Þar er skilað auðu um málið og ber hún ekki með sér neina raunhæfa viðleitni til að bæta úr ágöllum á skólakerfinu eða kynjahallanum sem einkennir það. Umbótum sýnist eiga að skjóta á frest. Nýtt Alþingi þarf að afloknum kosningum að taka fast á þeim brotalömum í skólakerfinu og kynjahalla sem svar ráðherra ber með sér.“
Lilja Alfreðsdóttir ráðherra hefur áður sagt að menntastefna hennar muni bæta stöðu drengja í skólakerfinu. Á þingfundi í febrúar nefndi ráðherrann leyfisbréf um að efla stöðu kennara, fjölgun kennaranema, skólaþróunarteymi og önnur verkefni sem dæmi um úrræði
