Mjög fjölmenn kynslóð eftirstríðsáranna nálgast nú eða hefur náð eftirlaunaaldri. Langflestir eru við góða heilsu og búa við sæmileg kjör, en framundan er óvissutími, því saman fer lægri eftirlaun en menn gerðu sér almennt grein fyrir og sífellt hærri lífaldur, - þessi hópur sér fram á að lifa 30 ár til viðbótar. Stór hluti þessa hóps getur, vill og verður að vinna lengur, en þá er yfir fjölmarga þröskulda að fara.
Landssamband lífeyrissjóða, Alþýðusamband Íslands og Samtök atvinnulífsins tóku höndum saman og boðuðu til ráðsstefnu um einmitt þessa stöðu: Hvaða áhrif hefur hækkandi lífaldur á stefnumörkun varðandi atvinnuþáttöku eldra fólks, eftirlaunaaldur og eftirlaun?
Kannanir sýna að 90 prósent Íslendinga eru hlynntir sveigjanlegum eftirlaunaaldri, það er að fá að trappa sig út af vinnumarkaðnum. Hins vegar eru tveir af hverjum þremur andvígir því að eftirlaunaaldur verði hækkaður yfir línuna með lagabreytingum.
Þátturinn er á dagskrá kl.19.30 í kvöld og Helgi ræðir þar við Jakobínu Hólmfríði Árnadóttur, hópstjóra ráðninga hjá Capacent, Elínu Björgu Jónsdóttur, formann BSRB, Hannes Sigurðsson frá Samtökum atinnulífsins, Þóreyju Þorsteinsdóttur, framkvæmdastjóra Landssamtaka lífeyrissjóða og Karl Björnsson hjá Samtökum sveitarfélaga.
