Grískir ráðamenn hafa að engu samstöðu Evrópusambandsins gegn Rússlandi og funda nú með Vladimír Pútín Rússlandsforseta. Bæði ríkin standa frammi fyrir miklum efnahagsörðugleikum, og vandséð hvernig Grikir geti grætt á auknum samskiptum við Rússa sem að auki ganga þvert á öll milliríkjasamskipti Evrópusambandsins og NATÓ.
Ríkisstjórn Alexis Tsipras á í miklum útistöðum við önnur Evrópusambandsríki um hvernig beri að leysa efnahagsvanda grísku þjóðarinnar og greiða af lánum ríkisins. Þetta útspil virðist einungis gert til að ögra ráðamönnum í Evrópu. Tsipras hefur gagnrýnt viðskiptaþvinganir Evrópusambandsins og Bandaríkjanna vegna íhlutunar Rússa í Úkraínu.
Martin Schulz forseti Evrópuþingsins er ómyrkur í máli yfir heimsókn gríska forsætisráðherrans til Rússlands. Hann segir Grikkja krefjast mikillar samstöðu frá ESB, og það sé eðlilegt að krefjast sömu samstöðu frá Grikklandi.
Þannig dýpkar deilan um efnahagsaðgerðir í Grikklandi dag frá degi, og ljóst að lausn er ekki í sjónmáli. Grikkir hafa að auki farið fram á að Þjóðverjar borgi þeim stríðsskaðabætur vegna heimstyrjaldarinnar síðari.
