Það eru blikur á lofti á íslenskum vinnumarkaði. Kjarasamningar langflestra opinberra starfsmanna hafa nú verið lausir í tæpa ellefu mánuði. Ótímabundið verkfall félagsmanna Eflingar hjá Reykjavíkurborg hófst í gær og aðildarfélög BSRB hafa boðað víðtækar verkfallsaðgerðir sem gætu hafist í næsta mánuði.
Til samanburðar liðu rúmir þrír mánuðir frá því að samningar á almennum vinnumarkaði losnuðu og þar til skrifað var undir Lífskjarasamninginn. Þótti mörgum nóg um og kostaði niðurstaðan töluverð átök og verkföll. Þess vegna er í raun mesta furða hvað opinberu félögin hafa sýnt mikla biðlund.
Formaður BSRB sagðist í viðtali í Fréttablaðinu í gær upplifa það þannig að viðsemjendur hefðu ekki tekið það alvarlega þegar bent hefði verið á hina miklu bið eftir samningum. Vissulega hafa átta aðildarfélög BHM samið við ríkið en öll eiga þau hins vegar ósamið við Reykjavíkurborg og önnur sveitarfélög. Í þeim samningum sem gerðir hafa verið við ríkið er að finna hækkanir umfram Lífskjarasamninginn fyrir hópa sem ekki eru á lægstu laununum. Það er því búið að setja fordæmi fyrir hækkunum umfram Lífskjarasamninginn fyrir tiltekna hópa.
Samninganefndir Eflingar og Reykjavíkurborgar munu loksins funda í dag en síðasti fundur var fyrir tæpum tveimur vikum. Vonandi munu viðræðurnar þokast áfram en af fenginni reynslu er lítil ástæða til bjartsýni.
Það er áhugavert að rifja upp samstarfssáttmála meirihlutans í borgarstjórn Reykjavíkur. Í kafla um skóla- og frístundamál segist meirihlutinn meðal annars ætla að „bæta starfsumhverfi í leikskólum, grunnskólum og frístundaheimilum með því að bæta kjör starfsfólks, stytta vinnuvikuna“. Þá segir í kafla um kynjajafnrétti og kjaramál að meirihlutinn ætli að leiðrétta laun kvennastétta.
Það liggur fyrir að meirihlutinn er ekki hlynntur hugmyndum Eflingar í þessum málum. Áhugavert væri hins vegar að heyra hvaða leiðir meirihlutinn vill fara til að ná fram markmiðum eigin sáttmála.
Þær raddir heyrast að verði borgin við kröfum Eflingar muni það leiða til óeðlilega lítils launamunar milli faglærðra og ófaglærðra starfsmanna á leikskólum. Ekki skal gert lítið úr þeim málflutningi en lausnin blasir auðvitað við. Það þarf líka að hækka laun menntaðra leikskólakennara. Samkvæmt lögum eiga tveir þriðju stöðugilda starfsmanna sem sinna kennslu, umönnun og uppeldi barna í hverjum leikskóla að hafa leikskólakennaramenntun eða aðra uppeldismenntun. Þetta hlutfall er undir 40 prósentum hjá Reykjavíkurborg. Af hverju ætli það sé?
Birtist áður í Fréttablaðinu
