Smári Sigurðsson var fyrir stundu kjörinn nýr formaður Slysavarnafélagsins Landsbjargar á landsþingi á Ísafirði. Smári hlaut 92 atkvæði en mótframbjóðandi hans, Margrét L. Laxdal, hlaut 89 atkvæði. Á fimmta hundrað manns sitja þingið þar sem stefna félagsins er mótuð til næstu ára.
Smári er úr björgunarsveitinni Súlum á Akureyri en Margrét úr Slysavarnadeildinni Dalvík þannig að um grannaslag var að ræða. Landsþingið hófst í gærkvöldi þar sem frambjóðendur grilluðu hamborgara ofan í þinggesti í Arnardal. Það er spurning hvort frammistaða þeirra hafi haft einhver áhrif á formannskjörið.
Þingstörf hófust svo aftur í morgun með umræðuhópum þar sem rædd voru björgunarmál, slysavarnamál og unglingamál. Þegar þeirri hópavinnu lauk tók Haukur Ingi Jónasson við með vinnu að stefnumótun félagsins. Þingstörf halda svo áfram í dag og eftir að þingi lýkur verður árshátið félagsins haldin í íþróttahúsinu í kvöld.
