Einar Sveinbjörnsson veðurfræðingur segir málflutning Jóns Þórs Ólafssonar, þingmanns Pírata, í ræðu sinni um áhrif hlýnunar sjávar í kringum landið vera rangan.
Í ræðunni sagði Jón Þór að hlýnun sjávar við strendur landsins þýddi tvennt: meiri makríl og sterkari storma sem stundum toga heimskautaloftið yfir okkur. Hann segir þá að þeim sem ekki vilja trúa að sjórinn við Ísland sé orðinn heitari og að það þýði að hingað komi sterkari stormar sem blási stundum köldu lofti yfir landið sé ekki treystandi fyrir raforkuöryggi, almannavörnum eða stjórn landsins yfirleitt.
Veðurfræðingurinn Einar segir þetta undarlegan málflutning.
„Skoðum málflutninginn nánar:
1. Sjórinn við Ísland er heitari en hann var. = Makríll.
Fær varla staðist. Makrílstofninn hefur verið mjög stór í 10-12 ár. Leitar æti á sumrin eftir hrygningu, einkum rauðátu úti á Atlansthaf, m.a. á Íslandsmið. Hefur kannski eitthvað með sjávarhita að gera, en hér er gnægð átu þessi árin, þegar lítil samkeppni er frá vorgotssíldinni austan úr Noregi eða öðrum uppsjávarstofnum sem þykja fremur óburðugir þessi árin,“ segir hann í færslu á Facebook.
„2. Heitari sjór þýðir tíðari og sterkari storma sem stundum toga heimskautaloftið yfir okkur. = 50 ára seltu-stormurinn um daginn sem sló út rafmagnið víða.
Undarleg staðæfing. Heitari sjór kann að færa til algengustu lægðabrautir. Ekkert er hins vegar enn í hendi í þeim efnum. Mönnum gengur erfiðlega að sýna fram á breyttan lægðagang með hlýnun loftslags. Seltustormurinn í desember var hending í röð fátíðra veðuratburða,“ heldur Einar áfram.
„Hins vegar er hiti í N-áttinni þessi árin ívið hærri heldur en áður var og þar með slydduísing á raflínur í útsveitum norðanlands í stað snjókomu áður. En stormar munu áfram toga heimskautaloft yfir okkur. Það leitar alltaf suður á bóginn á endanum, en tilviljun ræður því hvort það berst hingað austan Grænlands, eða suður yfir Ameríku, Asíu eða Skandinavíu að vetrarlagi. Við fáum alltaf okkar skammt öðru hverju! Öðru kann að gegna um hret að sumri?
Sveiflur hafa alltaf verið í tíðni og styrk sterkustu stormanna. Sum 5-10 ára tímabilin teljast stormasöm að vetri og önnur á milli að mestu ljúf og blíð. Fátt bendir til enn a.m.k. að sveiflurnar magnist eða að leitni í fjölda eða styrk lægða komi fram,“ segir hann að lokum.
