Stórfréttir fyrir kosninganörda

Fjörutíu og tvö prósent óákveðinna segjast ekki geta hugsað sér að kjósa Sjálfstæðisflokkinn.

31-33 prósent af sama hópi segjast ekki munu kjósa Framsóknarflokkinn, Miðflokkinn og Pírata.

Þetta kom fram í máli Þóru Ásgeirsdóttur, framkvæmdastjóra markaðs- og viðhorfarannsóknafyrirtækisins Maskínu, í Morgunvaktinni á Rás eitt í gær, 24. október.

Þar var rætt við Þóru um aðferðafræði við skoðanakannanir.

Fram kom að flest fyrirtæki notast við aðferð sem Ólafur Þ. Harðarson prófessor þróaði fyrir margt löngu þegar kemur að óákveðnum kjósendum.

Fyrst er spurt hvernig viðkomandi muni kjósa. Ef svarið er ´Veit ekki´ er spurt hvaða flokk sé líklegast að svarandinn kjósi.

Ef svarið er ennþá ´Veit ekki´ er spurt hvort líklegra sé að viðkomandi kjósi Sjálfstæðisflokkinn eða einhvern annan.

Þessi aðferð við spurningar var búin til þegar Sjálfstæðisflokkurinn hafði fylgi í kringum 38-40 prósent og var notuð til að taka hann út fyrir sviga og mæla betur hvernig hugur hinna óákveðnu skiptist á milli annarra flokka.

Nú er öldin hins vegar önnur og Maskína hefur prófað sig áfram með nýja nálgun.

Þriðja spurning Maskínu til óákveðinna er ´Eru einhverjir flokkar sem þú gætir ekki hugsað þér að kjósa?´

Þá eru niðurstöðurnar þær sem að ofan greinir, þótt Maskína hafi ekki birt þær opinberlega.

Meðal hinna óákveðnu getur mun hærra hlutfall en í hópi ákveðinna alls ekki hugsað sér að kjósa Sjálfstæðisflokk, Miðflokk, Framsóknarflokk og Pírata.

Það þýðir að Björt framtíð, Viðreisn, Samfylkingin og Vinstri græn eiga von um meira fylgi en kannanir benda almennt til.

Af því að stærstur hluti hinna óákveðnu ætlar ekki að kjósa hina.

Og allra síst getur Sjálfstæðisflokkurinn vænst meira fylgis en kannanir sýna.