„Enginn starfsmaður með skerta starfsgetu starfar í ráðuneytinu um þessar mundir,“ segir í svari Bjarna Benediktssonar fjármálaráðherra við fyrirspurn Oddnýjar Harðardóttur þingmanns Samfylkingarinnar.
Oddný lagði fram fyrirspurn í tveimur liðum:
- Hve margir einstaklingar með skerta starfsgetu, sbr. lög um jafna meðferð á vinnumarkaði, starfa í fjármála- og efnahagsráðuneytinu?
- Hefur stefna verið mótuð fyrir ráðuneytið um ráðningar einstaklinga með skerta starfsgetu?
Í svari við seinni lið fyrirspurnarinnar kemur fram að ekki hafi verið mótuð sérgreind stefna fyrir ráðuneytið um ráðningar einstaklinga með skerta starfsgetu. Þó er bent á að í mannauðsstefnu Stjórnarráðsins komi fram að allt starfsfólk eigi að eiga sömu möguleika á að geta nýtt hæfileika sína í starfi og skuli ekki sæta mismunun af nokkru tagi. Þetta taki meðal annars til starfsfólks með skerta starfsgetu.
Í tilkynningu frá Öryrkjabandalaginu segir Þuríður Harpa Sigurðardóttir, formaður bandalagsins, að svar Bjarna sé að mörgu leyti merkilegt. Þarna fari sá ráðherra sem hvað harðast hafi talað fyrir starfsgetumati, og að ekkert andrými væri í fjárlögum fyrir öryrkja fyrr en starfsgetumat yrði tekið upp.
„Það er því sérkennilegt, svo ekki sé dýpra í árina tekið, að hans eigið ráðuneyti skuli ekki ganga á undan með góðu fordæmi, og ráða inn fólk með skerta starfsgetu,“ segir Þuríður.
