Elliði Vignisson, bæjarstjóri í Ölfusi, skrifar grein í Fréttablaðið í dag þar sem hann fjallar um EES-samninginn, ESB og þriðja orkupakkann. Hann veltir því upp í greininni hvort EES-samningurinn sé ekkert annað en upphitun fyrir aðild Íslands að ESB og færir fyrir því rök.
„Dæmisagan um hvernig best sé að sjóða frosk lifandi er á þann veg að það sé röng leið að setja hann beint í sjóðandi vatn. Þá skynji hann hættuna og hoppi upp úr. Sé hann hins vegar settur í volgt vatn og hitastig þess svo hækkað hægt og rólega upp í suðumark, þá liggi hann rólegur allt þar til að hann er í senn dauður og mauksoðinn.”
Segir Elliði í upphafi greinar sinnar sem ber heitið „Froskar í suðupotti!“. Hann segist síðan stundum velta fyrir sér hvort aðild Íslands að EES-samningnum sé í raun og veru hið ylvolga vatn sem endar við suðumark aðildar að ESB.
„Sá hluti EES-samningsins sem snýr að aðlögun að ESB er að verða meira áberandi eftir því sem tímanum fram vindur. Geta þingmanna til að stjórna í sínu landi sé að verða frekar táknræn en raunveruleg. Alþingi sé stimpilstofnun á tilskipanir. Þetta sést ekki hvað síst í umræðu um hinn blessaða Orkupakka 3. Þar, og víðar, birtist það sem ætíð lá í augum uppi, að EES-samningurinn er hreinlega undirbúningur að inngöngu í ESB. Hugsaður þannig af ESB, hannaður þannig af sambandinu og undirritaður af fulltrúum okkar.”
Hann segir að um þetta þurfi ekki að efast.
„Á vefsíðu ESB segir að samningurinn sé: „… hannaður sem eins konar biðstofa fyrir hlutlaus EFTA-ríki“ („Designed as a sort of waiting-room for the neutr al EFTA states …“). ESB skilgreinir samninginn enda ekki sem viðskiptasamning heldur „association agreement“. Eðlileg þýðing á því orði væri „sambandssamningur“ en utanríkisráðuneytið þýðir það af einhverjum ástæðum sem „samstarfssamning.“
Segir Elliði og bætir við að það sé auðvelt að bera virðingu fyrir afstöðu þeirra sem vilja ganga í ESB, mörg sterk rök séu fyrir inngöngu. Það sé einnig auðvelt að virða afstöðu þeirra sem ekki vilja ganga í ESB því þar liggi einnig sterk rök að baki.
„Það er ekki síður auðvelt að virða gagnstæða afstöðu enda liggja ekki síður sterk rök þar að baki. Það sem ekki er hægt að þola er hins vegar að storma þjóðinni í fang yfirþjóðlegs valds á fölskum forsendum. Íslendingar eru ekki froskar í suðupotti.”
