Hækkanir efli hagvöxt
Framkvæmdastjóri Starfsgreinasambandsins segir heimsendaspár sem dregnar séu fram í aðdraganda kjaraviðræðna ekki eiga við rök að styðjast, síðustu hækkanir hafi ekki orðið til þess að verðbólgan færi af stað og engin bein tenging milli hækkana handa launafólki og verðbólguaukningar.
„Þvert á móti má segja að það sé ekkert betra fyrir hagvöxt en að hækka lægst launaða fólkið á Íslandi,“ segir Drífa Snædal.
Tónar sendir yfir samningaborðið
Verkalýðsleiðtogar hafa lýst því yfir að horft verði til úrskurða kjararáðs. Krafa um fjörutíu og fimm prósenta hækkun sé ekki endilega óraunhæf í ljósi þeirra. Drífa segir kröfurnar þó koma til með að taka mið af því hvort stjórnvöld séu tilbúin til þess að ráðast í aðgerðir í húsnæðismálum og breyta skattkerfinu.
„ Við erum snemma í ferlinu núna og við höfum oft séð það áður að það er aðeins verið að senda tóna yfir samningaborðið í aðdragandanum, svo er það ekki alveg það sem er gert. Það eru engar kröfur komnar fram ennþá,“ segir Már Guðmundsson, seðlabankastjóri.
Þá sé rétt að hafa í huga að það sé að hægjast á í þjóðarbúskapnum. Það hafi alltaf haft sitt að segja varðandi kjarasamninga og ástand á vinnumarkaði.
Minna svigrúm
Már segir að svigrúmið til mikilla kauphækkana án þess að það fari út í verðbólgu sé orðið minna en það var en vill ekki segja til um hversu mikið minna. Seðlabankinn meti það betur um næstu mánaðarmót. Stundum sé svigrúmið meira og stundum minna en til langtíma, tíu til tuttugu ára, sé það þannig að sé verðbólgan 2,5% geti laun hækkað um það að viðbættri framleiðniaukningu.
„Ég held við verðum bara að bíða aðeins og sjá hver framvindan verður í þjóðarbúskapnum og hver staðan verður núna á haustmánuðum áður en við höfum eitthvað betra mat á þvi,“ segir Már.
Nánar á
http://www.ruv.is/frett/ekki-timabaert-ad-segja-til-um-ahrif-samninga
