Vegir um Hellisheiði, Sandskeið og Þrengsli eru lokaðir, eins er lokað um Kjalarnes og Mosfellsheiði, ekkert ferðaveður er á þessum slóðum. Hált og skafrenningur er á Reykjanesbraut. Lögregla á höfuðborgarsvæðinu beindi í morgun þeim tilmælum til fólks í Grafarvogi og Grafarholti að halda sig innan dyra fram eftir degi vegna veðurs og ófærðar í hverfunum. Þar hafa björgunarsveitir verið að störfum í morgun. Helst við að hjálpa fólki heim sem hafði fest bíla sín. Bárujárnsplötur og ýmislegt lauslegt hefur fokið í borginni.
Veginum til Súðavíkur hefur verið lokað vegna snjóflóðahættu. Siglufjarðarvegur og Ólafsfjarðarmúli eru lokaðir vegna snjóflóðahættu.
Flugfélag Íslands hefur frestað flugi til Akureyrar sem átti að fara frá Reykjavíkurflugvelli á ellefta tímanum vegna veðurs. Aðstæður verða kannaðar aftur klukkan eitt og þá kemur einnig í ljós hvað verður ákveðið með síðdegisflugið sem á að fara í loftið klukkan tvö og rétt fyrir fimm. Ekki verður flogið til Ísafjarðar vegna veðurs.
Ekki er ljóst hvort flogið verður til Egilsstaða í kvöld, staðan verður athuguð rétt fyrir klukkan fjögur.
