Einn er látinn eftir bílveltu við Örlygshafnarveg á Vestfjörðum skammt frá Látravatni. Þetta kemur fram í tilkynningu á Facebook frá lögreglunni á Vestfjörðum.
Um klukkan 10:13 í morgun kom vegfarandi að bifreið sem hafði oltið út af Örlygshafnarvegi, skammt frá Látravatni. Ökumaður, sem var einsamall í bifreiðinni, reyndist látinn.
Samkvæmt tilkynningu lögreglunnar virðist sem bifreiðin hafi runnið út af veginum og oltið að minnsta kosti eina veltu þar til hún staðnæmdist.
Lögregla, sjúkra- og slökkviliðsmenn voru kölluð á vettvang frá Patreksfirði og beita þurfti klippum og öðrum búnaði til að losa ökumann úr bílflakinu.
Tildrög slyssins eru til rannsóknar hjá lögreglunni á Vestfjörðum en einnig er aðili frá rannsóknarnefnd samgönguslysa á vettvangi.
Fjölskyldu hins látna hefur verið tilkynnt um slysið og samkvæmt lögreglu stendur rannsókn yfir og því ekki tímabært að fjalla nánar um það að svo stöddu.
