„Á árunum 2011-12 var brugðist við stórtækum fyrirætlunum Huangs Nubo um jarðakaup í Þingeyjarsýslu, sem telja mátti að tengdust risahöfn í Þistilfirði á vegum ókunnra aðila. Þeirri vá var þó bægt frá í bili með reglugerð innanríkisráðherra, sem gerði útlendingum óheimilt að eignast hér fasteignir nema með fastri búsetu.“
Þetta segir meðal annars í pistli eftir Einar Benediktsson, fyrrum sendiherra, í Fréttablaðinu í dag en hann ber heitið fyrr og síðar. Þar fjallar hann meðal annars um stórfelld jarðakaup útlendinga hér á landi og bendir á að 2011 og 2012 hafi verið brugðist við stórtækum áætlunum Kínverjans Huangs Nubo um jarðakaup í Þingeyjarsýslu með reglugerð innanríkisráðherra. Samkvæmt henni máttu útlendingar ekki eignast fasteignir hér á landi nema með fastri búsetu. Talið var að jarðakaup Nubo tengdust áætlunum um risahöfn í Þistilfirði. Einar segir að mikilvægt sé að bregðast við og bendir á að Danir hafi tryggt sér álíka ákvæði í aðildarsamningi sínum við Evrópusambandið en samt sem áður hafi Íslendingar fellt fyrrnefnda reglugerð úr gildi.
„Nú þarf að endurvekja þessa bráðnauðsynlegu – vital interest – ráðstöfun enda hefur þessi danska löggjöf beint fordæmisgildi fyrir okkur þegar um var að ræða ekki síður ríkar ástæður en sumarbústaðaásókn nágranna Dana á Jótlandi. Stórfelld jarðakaup breska billjónerans Jims Radcliffe vegna laxveiðiréttinda á Norðausturlandi vekja furðu og ugg fólks. Brask með landgæði hefur greinilega staðið um árabil ef 60 jarðir eru komnar í eigu erlendra fjárfesta. Forsætisráðherra hefur boðað birtingu stefnumörkunar á þessu sviði í haust en er ekki tilefni til bráðabirgðaráðstafana?“
Spyr Einar og víkur síðan stuttlega að mikilvægi EES samningsins fyrir þjóðina og háværri andstöðu gegn innleiðingu þriðja orkupakkans. Hann segir þá andstöðu byggjast á fáránlegum málatilbúningi sem stofni sjálfri þátttökunni í Evrópska efnahagssvæðinu í hættu.
