Sjónvarpsmaðurinn Egill Helgason skrifaði á Eyjuna í dag um heitavatnsleysið í vesturborginni í gær. Hann segir að fólk þurfi að hugsa um þægindin sem það býr við, að hafa hita, vatn og rafmagn.
Egill segir frá því að kalt hafi verið orðið í húsinu hans, en að honum finnist hann hálfpartinn hafa verið svikinn af því hversu hratt viðgerðin gekk fyrir sig.
„Manni finnst næstum að maður hafi verið svikinn um eitthvað-“ skrifar Egill, „pínulítið sýnishorn af hamförum sem þjappar fólki saman, svona eins og þegar maður var barn og rafmagnið fór af fyrir jólin.“
Hann hafi verið búinn að taka fram rafmagnsofna, teppi og kakó sem hafi svo reynst óþarfi, þar sem heitavatnsleysið hafi ekki varað jafn lengi og við hafði verið búist.
Tóku sauði með sér upp í rúm
Hann segir að fólk megi hugsa meira til þess hversu mikill lúxus það er að hafa rennandi vatn, hita og rafmagn. „En þegar það hverfur skekur það nánast tilveru okkar.“
Fyrr á öldum hafi það eitt að ná í vatn verið mikil vinna og Íslendingar hafi búið við kulda og bleytu. „Það þekktist meira að segja að taka sauði með sér í bólið til að hafa úr þeim hitann.“
Hiti, rafmagn og rennandi vatn sé því ekki eins sjálfgefið og við höldum stundum.
