Egill Helgason fjölmiðlamaður segir að Íslendingur ættu frekar að nota síma eða tölvupóst en vefsíður á borð við Booking þegar þeir bóka ferðir hérlendis.
Þetta sagði Egill í færslu á Baklandi ferðaþjónustunnar um helgina. Þar var til umræðu frétt Morgunblaðsins frá því á laugardag, en í henni kom fram að Ferðamálstofa þyrfti að eyða gríðarlegum fjármunum til að fá auglýsingar sínar ofar en auglýsingar Booking.com og sambærilegum bókunarvélum á leitarvél Google.
Eins og komið hefur fram hyggst Ferðamálastofa eyða talsverðum fjárhæðum í auglýsingakaup hjá erlendum miðlum en átakið miðar að því að hvetja Íslendinga til að ferðast innanlands.
Í frétt Morgunblaðsins var rætt við Hermann Valsson, ferðamálafræðing, sem hefur rannsakað bókunarvefi á borð við Booking. Hann segir að þegar fólk bókar í gegnum Booking fari 22 til 26% greiðslunnar í vasa Booking.com. Taldi hann að Ferðamálastofa ætti að gera það sem hún getur til að aðstoða Íslendinga við að bóka beint hjá ferðaþjónustuaðianum en ekki í gegnum bókunarvélar.
Egill tekur undir þetta og segir „blóðugt að þessir peningar fari úr landi vegna ferðalaga Íslendinga á Íslandi.“ Hann segist mæla með að fólk noti frekar síma eða tölvupóst í staðinn fyir Booking. „Eða bóka beint á netsíðum hótela og gistihúsa þar sem hægt er. Við eigum ekki að fóðra þennan millilið,“ segir hann.
