„Kæru vinir, eins og þið ef til vill vitið ríkir algört neyðarástand hér í Nepal. Hjarta mitt slær með þeim sem eiga um sárt að binda, misst hafa heimili og ástvini. Við misstum 5 manns í kjölfarið á jarðskjálftanum og 9 slösuðust," skrifar Vilborg Arna Gissurardóttir í áhrifamiklum pistli á Facebook-síðu sinni í dag.
Hún segir alla göngufélaga sína syrgjam látna félaga og senda fallegar hugsanir til hinna slösuðu. Sjálf sé hún mjög þakklát fyrir að vera á lífi eftir þessar náttúruhamfarir. Ef hún hefði verið stödd í tjaldinu sínu þegar flóðin riðu yfir hefði ekki þurft sð spyrja að leikslokum. "Kampurinn okkar er gjörónýtur,“ skrifar Vilborg.
Hún segir það hafa verið mikið áfall að koma niður í grunnbúðirnar og sjá hvernig þar var umhorfs. "Við vorum stödd í búðum eitt þegar stóri skjálftinn varð. Ég lá í tjaldinu mínu að slappa af þegar ég fann titringinn, verandi á skriðjökli stökk ég út til að kanna hvað var um að vera. Erfitt var að átta sig á aðstæðum og fljótlega fórum við að heyra í snjóflóðum,“ skrifar hún og bætir við: "Við stukkum inn í tjald og grúfðum okkur niður og óskuðum þess heitast að það næði ekki til okkar. Hjartað sló hratt og óttinn var yfirgnæfandi. Búðirnar sluppu og við sátun eftir í stóru púðurskýi, það næsta sem við heyrðum var að ekkert væri eftir af búðunum okkar niðri. Smá saman fengum við fleiri bita í púsluspilið og myndin var skelfileg. Það var erfitt að vera fastur og geta lítið lagt af mörkum. Næstu klukkustundir og næsta nótt voru erfið. Ég hef aldrei verið jafn hrædd,“ skrifar Vilborg.
Hún segist hafa komið niður í grunnbúðirnar í gær og að það hafi verið mikið áfall að sjá hvernig var umhorfs: "Staðan í þorpunum í kringum okkur er mjög slæmt. Við erum nú að hreinsa umhverfið okkar en ekki er ljóst hvenær við leggjum af stað til höfuðborgarinnar. Við erum skelkuð eftir atburði síðustu daga en að öðru leyti hraust,“ segir Vilborg í færslunni
