Á Facebook síðunni Black Lives Matter Iceland má finna frásagnir fólks á því að vera með dökkan húðlit á Íslandi en fjöldi fólks um allan heim hefur mótmælt rasisma síðustu vikur í kjölfar dauða George Floyd í Bandaríkjunum og hafa meðal annars þó nokkrir Íslendingar tjáð sig um málið.
Hin 27 ára gamla Þórunn Lilja er meðal þeirra sem greinir frá reynslu sinni en Þórunn er að eigin sögn svartur blandaður Íslendingur þar sem móðir hennar er íslensk og faðir hennar frá Gambíu. Hún greinir frá því að hún hafi aðeins verið fjögurra eða fimm ára gömul þegar hún fann fyrst fyrir því að hún leit ekki út eins og aðrir krakkar í kringum sig. „Ég ólst upp í litlum bæ útá landi og fyrir utan mig og yngri systir mína var enginn dökkur,“ segir Þórunn.
„Í grunnskóla var ég lögð í mikið einelti aðallega vegna húðlitar míns strax frá 1. bekk og ég fékk í rauninni aldrei að „gleyma“ því að ég væri öðruvísi en samnemendur mínir, sumir þeirra jafn mikið erlendir og ég bara hvítir á hörund svo það skiptir ekki máli,“ segir Þórunn. Í færslunni segist hún minnast þess sterklega að hafa séð auglýsingu fyrir hvíttunarkrem í sjónvarpinu og í kjölfarið beðið ömmu sína um að fá þannig krem svo hún gæti verið hvít.
Áreiti frá fullorðnum stigmagnaðist
Fjölskyldan flutti til Reykjavíkur þegar hún var tólf ára gömul en þrátt fyrir að þar væru fleiri sem litu út eins og hún hafi áreitið frá fullorðnum stigmagnast. „Þrátt fyrir að bera íslenskt nafn og tala afbragðs íslensku virðist fólk ekki taka annað í mál en að ég sé útlensk eða blendingur,“ segir Þórunn enn fremur og bætir við að fólk hafi ekki tekið það sem gilt svar að hún væri frá Fáskrúðsfirði.
Þá hafi hún átt erfitt með að vera með öðruvísi hár og notaði hárkollur til að vera með eins hár og stelpurnar í kringum sig. „Ég gat ekki labbað í kringlunni án þess að ókunnugt fólk labbaði upp að mér og óð með hendurnar í hárið á mér án þess að biðja um leyfi,“ segir Þórunn.
Fáir gangist við rasískri orðræðu
„Ég er að verða 28 ára gömul og fyrst núna er ég farin að taka það í sátt að ég sé svört (það er samt ennþá dagleg barátta) og að það að vera öðruvísi þarf ekki að vera slæmt. Er hætt að slétta á mér hárið til þess að falla betur inní hópinn og er farin að tjá mig um þá rasísku orðræðu sem er svo sterk hér á landi þó svo að fáir vilja gangast við því.“
„Það að fá að vera partur af hóp eins og þessum, geta tjáð mig og það sé fólk sem skilur hvernig það er að vera svartur á Íslandi er það sem ég hef þráð lengi! Það að geta frætt sem flesta í leiðinni er stór plús og vonandi skilar það árangri,“ segir Þórunn að lokum.
Frásögn Þórunnar í heild sinni og fleiri sögur má nálgast á Facebook síðunni Black Lives Matter Iceland.
