María Ósk Óskarsdóttir, sveitarstjórnarfulltrúi í Vesturbyggð og leiðbeinandi í Patreksskóla, ræðir opinskátt um einelti sem hún beitti samstarfskonu sína í skólanum á Facebook síðu sinni. „Ég er ekki stolt af því en gengst við því,“ segir María.
Tveir menntaðir starfsmenn Patreksskóla sögðu upp störfum vegna meints eineltis Maríu í fyrra. Fimm manna hópur kennara og leiðbeinenda fór í kjölfarið á fund félagsmálastjóra Vesturbyggðar og kvartaði undan framkomu hennar.
„Ég er sek um að hafa beitt einelti, með því að hunsa. Ég er sek um það að vera mannleg og hafa látið tilfinningar mínar í persónulegu máli stjórna mér á mínum vinnustað.“
Nánasta fjölskylda viðloðin við málið
María segir eineltismálið tengjast hennar nánustu fjölskyldu og erjum innan hennar. „Ég verð að viðurkenna að ég lét tilfinningar mínar í garð mágs míns, Gísla Ásgeirssonar, bitna á sambýliskonu hans.“ Sambýliskona Gísla starfaði í Patreksskóla ásamt Maríu en hún segir þær hafa reynt að umgangast hvor aðra sem minnst.
„Ég heilsaði henni ekki, ég gekk í burtu þegar hún settist inn á kaffistofuna, ég treysti mér ekki til þess að vera nálægt henni og hafði ekki áhuga á að vera í samskiptum við hana frekar en hún hafði áhuga á að vera í samskiptum við mig.“
Hefur enga áminningu fengið
Eineltisteymi Vesturbyggðar framkvæmdi rannsókn á málinu og birti þeim sem málið vörðuðu niðurstöður skýrslunnar í maí á síðasta ári. Kennarinn sem sakaði Maríu um einelti óskaði eftir því að málið yrði endurskoðað og sagði lögmaður hennar í samtali við Fréttablaðið að hún hyggðist leita réttar síns gagnvart sveitarfélaginu.
„Einhverjir virðast halda að hægt sé að leggja fram kæru á hendur mér sem séu til þess fallnar að mér verið sagt upp störfum við skólann. Það eru alrangar upplýsingar, ég sinni mínum störfum af heilindum bæði sem kennari og bæjarfulltrúi og hef enga áminningu fengið fyrir mín störf.“
Tímabundið leyfi vegna málsins
María óskaði þó nýlega eftir tímabundnu leyfi frá störfum í sveitastjórninni á meðan málið gengur yfir. „Atburðir síðastliðinnar viku hafa haft djúpstæð áhrif á mig, eiginmann minn, börnin okkar fjögur og fjölskyldur okkar beggja.“
Í lok færslunnar óskar María mág sínum og fjölskyldu hans alls hins besta. „Um leið og ég vona að þeim árásum sem ég hef orðið fyrir af hálfu Gísla ljúki.“
