Efri deild Mannréttindadómstóls Evrópu hefur ákveðið að taka hið svokallaða Landsréttarmál fyrir. Alls munu fimm dómarar taka málið til umfjöllunar. Kjarninn greinir frá.
Dómur MDE féll í málinu þann 12. mars síðastliðinn og daginn eftir ákvað Sigríður Á. Andersen að stíga til hliðar sem dómsmálaráðherra. Í apríl síðastliðnum ákvað íslenska ríkið svo að áfrýja niðurstöðu MDE til efri deildar dómsins, sem hefur nú ákveðið að taka málið fyrir.
Í dómnum fengu Sigríður og Alþingi á sig áfellisdóm fyrir það hvernig staðið var að skipun 15 dómara við Landsrétt í byrjun júní 2017.
MDE komst að þeirri niðurstöðu að skipun Sigríðar á fjórum dómurum við Landsrétt hafi brotið gegn 6. grein mannréttindasáttmála Evrópu. Íslenska ríkið væri því bótaskylt í máli sem Guðmundur Andri Ástráðsson höfðaði gegn því og fór með fyrir Mannréttindadómstól Evrópu. Alþingi hlaut áfellisdóm fyrir að hafa kosið um skipan dómaranna allra í einu í stað þess að kjósa um hvern þeirra fyrir sig.
Ástráður Haraldsson, Jóhannes Rúnar Jóhannsson, Jón Höskuldsson og Eiríkur Jónsson, voru á lista hæfnisnefndar yfir hæfustu umsækjendur vegna skipan dómara við Landsrétt en voru hvergi sjáanlegir á lista Sigríðar þegar kom að skipan 15 dómara við Landsrétt. Í þeirra stað skipaði Sigríður þau Arnfríði Einarsdóttur, Ásmund Helgason, Jón Finnbjörnsson og Ragnheiði Bragadóttur sem dómara, án þess að rannsaka og rökstyðja þá ákvörðun með fullnægjandi hætti að mati MDE.
Guðmundur Andri hafði verið dæmdur í 17 mánaða fangelsi í Landsrétti fyrir ýmis brot. Honum þótti Arnfríður Einarsdóttir, sem Sigríður skipaði sem dómara við Landsrétt, vera vanhæf þar sem hún hafi ekki verið á meðal fimmtán hæfustu umsækjenda á lista hæfnisnefndar. Guðmundur Andri hafi því ekki hlotið réttláta málsmeðferð, en 6. grein mannréttindasáttmála Evrópu fjallar um rétt einstaklinga til réttlátrar málsmeðferðar fyrir dómi. MDE féllst á þessi málsrök.
