Viðskiptaráð íslands hvetur stjórnvöld til að draga verulega úr ríkisútgjöldum á næstu mánuðum til að slá á þensluáhrif nýrra kjarasamninga og áhriofanna af losnun gjaldeyrishafta. Ráðið hræðist þann freisnivanda sem blasi við ráðamönnum.
Lánshæfiseinkunn ríkissj´æoðs hefur sem kunnugt er hækkað vegna áætlunar stjórnvalda um afnám hafta. Samkvæmt matsfyrirtækjunum er áætlunin bæði ítarleg og trúverðug. Þá mun innleiðing hennar bæta skuldastöðu ríkissjóðs og styðja við efnahagslegar framfarir á næstu árum. Gangi afnámsáætlunin eftir ásamt áætlun stjórnvalda um niðurgreiðslu skulda telja matsfyrirtækin fyrirséð að lánshæfiseinkunn ríkissjóðs hækki enn frekar í náinni framtíð.
Viðskiptaráð segir í tilkynningu sinni í dag að þrátt fyrir þessar jákvæðu fregnir séu hættumerki til staðar. Hækkunin byggi á þeirri lykilforsendu að þeir fjármunir sem falli til við afnám hafta verði nýttir til að bæta skuldastöðu ríkissjóðs en ekki til þensluaukandi útgjalda. Þá geti áhrif kjarasamninga á verðbólgu grafið undan lánshæfismatinu á komandi árum.
\"Samkvæmt Seðlabanka Íslands gætir þegar þensluáhrifa í íslensku hagkerfi og mun svo áfram vera á næstu árum. Á slíkum tímum er lykilverkefni stjórnvalda að draga úr opinberum útgjöldum og greiða niður skuldir. Þannig skapar hið opinbera heilbrigt mótvægi gagnvart þeirri útgjaldaaukningu sem á sér stað hjá einstaklingum og fyrirtækjum,\" segir í tilskrifi ráðsins og ennfremur: \"Vísbendingar eru um að þessu verkefni hafi ekki verið sinnt undanfarið. Samkvæmt ríkisreikningi fyrir árið 2014 jukust útgjöld ríkissjóðs um 13. ma. kr. á milli ára. Frekari vöxtur opinberra útgjalda á þessum tímapunkti mun leiða til aukinnar þenslu og verri skuldastöðu en ella sem er líklegt til að lækka lánshæfi ríkissjóðs á ný.\"
