Miklar umræður spunnust á Twitter nýlega er blaðamaðurinn Arnar Þór Ingólfsson birti mynd af glænýjum hjólastíg hjá Borgartúni þar sem búið er að planta umferðarskilti á miðjan stíginn.
Dóra Björt Guðjónsdóttir, oddviti Pírata í Reykjavík, lagði orð í belg og „létti aðeins á hjartanu“ eins og hún orðar það.
„Það eru svona vanhugsaðir hlutir - sem vantar upp á við framkvæmd okkar annars metnaðarfullu og grænu RVKstefnu - sem fylla mína daga við undirbúning funda skipulags- og samgönguráðs. Ég þarf sífellt að lagfæra og pota í svona hluti,“ skrifar Dóra Björt á Twitter.
Að sögn Dóru vantar skýran ramma í kringum borgarhönnun sem útskýrir í smáatriðum hvernig ráðstafa skuli borgarlandi og skipuleggja það út frá forsendum bæði gangandi og hjólandi og nefnir ýmis dæmi um hvað mætti betur fara.
Þá furðar hún sig á því að kjörnir fulltrúar sem eru ekki endilega sérfræðingar þurfi sífellt að grípa inn í svona mál.
„Það er fáránlegt að þetta sé svona hipsumshaps og að kjörnir fulltrúir sem koma að málum seint og um síðir og eru ekki endilega sérfræðingar í skipulagi eigi að þurfa að grípa svona (eins og er sífellt staðan). Þess vegna er stefna Pírata að skapa svona skýran ramma,“ skrifar Dóra.
Hún bætir því að lokum við að það hafi ekki verið stemning fyrir slíku þótt hún hafi talað mikið fyrir því og vilji sjá það skrifað inn í meirihlutasáttmála.
