Hæstiréttur Íslands staðfesti í dag dóm Héraðsdóms Reykjavíkur frá því fyrir mánuði þar sem kröfum Bandalags háskólamanna, BHM, um að lög sem sett voru á verkfall BHM stæðust ekki lög var hafnað. Lögin standa því óröskuð.
BHM stefndi ríkinu vegna lagasetningarinnar sem var samþykkt á Alþingi hinn 13. júní síðastliðinn, en hún bannaði verkfallsaðgerðir félagsmanna BHM. Málið var þingfest 19. júní og fékk málið flýtimeðferð, enaðalmeðferð í því fór fram 6. júlí síðastliðinn.
BHM áfrýjaði málinu til Hæstaréttar eftir að hafa tapað því íi héraði og tók æðst dómur það fyrir 10. ágúst.
Að mati BHM fól lagasetningin í sér ólögmætt inngrip í starfsemi frjálsra og löglegra félagasamtaka. Bendir bandalagið á að frelsi stéttarfélaga til að standa að gerð kjarasamninga sé varið af 74. grein stjórnarskrárinnar og að stjórnvöld og löggjafinn hafi afar takmarkaðar heimildir til að hafa afskipti af starfsemi slíkra félaga. Með lagasetningunni hafi ríkið farið út fyrir þær heimildir.
Ríkisstjórnin taldi hins vegar að um brýna nauðsyn væri að ræða. Verkfallsaðgerðirnar stefndu almannahagsmunum og réttindum annarra í hættu og ríkisstjórninni hefði verið nauðugur einn kostur að stöðva þær. Á þau rök fellst Hæstiréttur, rétt eins og Héraðsdómur.
