Sigríður Á. Andersen dómsmálaráðherra verður að vega og meta mjög alvarlega hvort henni sé stætt að sitja áfram í embætti ef niðurstaða dómstóla verður sú að hún hafi beitt ómálefnalegum sjónarmiðum við tilnefningu dómara í Landsrétt. Þetta segir Jón Steindór Valdimarsson, varaformaður stjórnskipunar- og eftirlitsnefndar í sjónvarpsþættinum Kjarnanum á Hringbraut þar sem skipan dómara í Landsrétt verður til umfjöllunar. Fyrirhuguð eru dómsmál vegna gjörða ráðherra.
Þátturinn verður frumsýndur klukkan 21:30 í kvöld.
Dómnefnd hafði komist að þeirri niðurstöðu að 15 af 33 umsækjendum væru hæfastir í þau 15 embætti dómara við Landsrétt sem í boði eru. Sigríður ákvað að breyta röðun listans með þeim hætti að fjórir sem dómnefnd tilnefndi hurfu af honum og fjórum öðrum var bætt við. Hún rökstuddi þessa ákvörðun sína með því að hún vildi gera dómarareynslu umsækjenda hærra undir höfði. Stjórnarandstaðan taldi að ráðherrann hefði ekki rökstutt breytingarnar sínar nægilega vel og vildi að ákvörðun í málinu yrði frestað þannig að hægt yrði að vinna það betur. Var það meðal annars gert vegna harðrar gagnrýni frá lögmönnum sem skiluðu umsögnum inn til stjórnskipunar- og eftirlitsnefndar og vegna þess að rökstuðningurinn gekk ekki upp ef hann miðað við stigagjöf dómnefndar fyrir dómarareynslu einvörðungu.
Málið var hins vegar samþykkt með atkvæðum stjórnarliða einvörðungu. Einn þeirra umsækjenda sem var fjarlægður af listanum, Ástráður Haraldsson, hefur þegar tilkynnt að hann muni stefna íslenska ríkinu og ráðherranum sjálfum vegna málsins og telur hana hafa brotið lög. Jóhannes Rúnar Jóhannsson, sem einnig var fjarlægður af listanum, hefur einnig sagt að hann íhugi að leita réttar síns.
Þátturinn Kjarninn er í umsjón Þórðar Snæs Júlíussonar og Þórunnar Elísabetar Bogadóttur.
