Veitingahúsið DILL Restaurant hefur verið tilnefnt til hinna virtu hönnunarverðlauna Restaurant & Bar Design Awards sem tekur til hönnunar, innréttingar, lýsingar og heildarupplifunar viðskiptavina en ekki um mat eða drykki.
Þetta er í sjöunda skiptið sem þessi verðlaun verða veitt og verður verðlaunaafhendingin í London 1. október næstkomandi. Meðal dómara eru Tony Chambers ritstjóri hins virta tímarits Wallpaper.
Að sögn staðarhalfdara á DILL eru verðlaunin mjög virt í sínum geira og fylgir því viss gæðastimpill fyrir þau tilnefndu fyrirtæki að komast á listann.
Þeir segja þetta vera mikla viðurkenningu fyrir DILL sem er til húsa að Hverfisgötu 12 í Reykjavík, en á sama stað má finna veitingarstaðina Hverfisgötu 12 og Mikkeller & Friends Reykjavík.
Hönnuður DILL Restaurant er Hálfdán Pedersen og hefur hann einnig hannað innréttingar á veitingarstaðnum að Hverfisgötu 12, Snaps, Kex Hostel, Geysi og Mikkeller & Friends Reykjavík. Hálfdán er leikmyndahönnuður og hefur hann hannað leikmyndir fyrir kvikmyndir á borð við The Good Heart, Fúsa og París Norðursins.
