Dagur B. Eggertsson, borgarstjóri Reykjavíkur, er sá sem flestir íbúar Reykjavíkur vilja sjá sem borgarstjóra eftir komandi sveitastjórnarkosningar. Hann og Eyþór Arnalds, leiðtogi Sjálfstæðismanna, eru þeir tveir sem flestir vilja sjá sem borgarstjóra, en tæplega þriðjungur kjósenda er enn óviss hvern þeir vilja helst sjá í embættinu.
Nokkur munur er á því hvar Dagur og Eyþór sækja vinsældir sínar, en Dagur nýtur umtalsvert meiri vinsælda í öllum hverfum borgarinnar vestan við Elliðaárnar meðan þeir eru hnífjafnir í Breiðholti. Dagur er örlítið ofar í Árbæ, en fleiri íbúar í Grafarvogi, Grafarholti og Úlfarsárdal telja Eyþór hins vegar vænlegri kost sem borgarstjóra.
Þetta er meðal þess sem kemur fram í niðurstöðum nýrrar könnunar Félagsvísindastofnunar Háskóla Íslands sem unnin var fyrir Morgunblaðið og mbl.is og birtist nú um helgina. Þar kemur fram að auki að Samfylkingin leiðir keppnina um 23 borgarstjórnarsæti í vor, fengi 8 fulltrúa, Sjálfstæðisflokkurinn 7, VG 3, Píratar 2, Viðreisn 2 og Miðflokkurinn 1. Meirihlutinn í borginni heldur því velli með samtals 13 borgarfulltrúa.
