Hinn 23 ára gamli Hjörvar Ari Ragnarsson var í dag dæmdur af Héraðsdómi Reykjavíkur í sex mánaða skilorðsbundið fangelsi fyrir að hafa veist að öðrum manni með „ítrekuðum höggum og spörkum í höfuð og líkana, þar af að minnsta kosti eitt hnéspark í höfuð,“ sumarið 2017 við Hlöllabáta á Ingólfstorgi.
Maðurinn hlaut mikla áverka eftir árásina en hann hlaut rifbeinsbrot bæði hægri og vinstra megin, heilahristing, brot úr neðri augntönn vinstra megin og sprungu í glerung, mar og bólgu á hægri kinn, mar á hægri upphandlegg og öxl, skrapsár á háls hægra megin og á hægra hné.
Hjörvar játaði skýlaust sök í málinu og viðurkenndi bótakröfu þolanda en Hjörvar krafðist þess að hann myndi hljóta vægustu refsingu. Hjörvar gerðist aftur á móti árið 2018 sekur um ölvunarakstur og gekkst við sekt og er brotið nú hegningarauki við þá sektargerð.
„Við ákvörðun refsingar er auk framangreinds, ákærða til málsbóta litið til þess að ákærði var ungur að aldri þegar hann framdi brotið, hann játaði brot sitt skýlaust fyrir dómi og samþykkti greiðslu bóta. Þá eru hátt í tvö og hálft ár frá því ákærði framdi brotið og verður ákærða ekki kennt um það hve rannsókn málsins dróst. Til refsiþyngingar er litið til þess að árás ákærða var gróf og beindist að höfði brotaþola,“ segir í dómnum.
Þá kemur fram að árásin hafi haft alvarlegar afleiðingar fyrir þolandann, en hann krafðist þess að Hjörvar skyldi greiða sér skaða- og miskabætur auk útlagðs kostnaðar og málskostnað, alls 1.313.968 krónur, sem Hjörvar samþykkti. Einnig þurfti hann að greiða 199.495 krónur í máls- og sakarkostnað.
