Carmen Jóhannsdóttir hefur lagt fram fram kæru á hendur Jóni Baldvini Hannibalssyni, vegna kynferðislegrar áreitni sem hún segir hann hafa beitt sig á heimili hans á Spáni þann 16. júní 2018. Mbl.is greinir frá.
„Málið er nú komið í hendur lögreglunnar á höfuðborgarsvæðinu. Ég ber fullt traust til embættisins og trúi því að málið verði rannsakað af fagmennsku. Að teknu tilliti til þessa mun ég ekki tjá mig meira um málið opinberlega að svo stöddu,“ segir í tilkynningu frá Carmen.
Mikill fjöldi kvenna hefur ásakað Jón Baldvin um kynferðisbrot og er tilfelli Carmen það nýjasta. Carmen er ein fjögurra kvenna sem stigu fram í viðtali í Stundinni í janúar og sögðu frá kynferðislegri áreitni og kynferðislegu ofbeldi sem þær urðu fyrir af hendi Jóns Baldvins. Elstu brotin eru sögð hafa átt sér stað þegar Jón Baldvin var kennari við Hagaskóla árið 1967.
Í viðtalinu við Stundina greindi Carmen frá því hvernig Jón Baldvin hafi strokið rass hennar ákaft í vitna viðurvist, sem hún segir hafa verið Bryndísi Schram, eiginkonu Jóns Baldvins, og móður sína. Carmen og móðir hennar höfðu verið í heimsókn hjá Jóni Baldvin og Bryndísi á heimili þeirra á Spáni en yfirgáfu það fljótlega eftir atvikið.
Í kjölfar umfjöllunar Stundarinnar var stofnaður sérstakur lokaður Metoo-hópur á Facebook þar sem mikill fjöldi kvenna til viðbótar steig fram og greindi frá ósæmilegri hegðun Jóns Baldvins. Í febrúar var síðan hluti þeirra frásagna birtur á sérstakri bloggsíðu, metoo-jonbaldvin.blog.is.
Jón Baldvin hefur ítrekað neitað allri sök í málunum, gagnrýnt það sem hann kallar öfgafemínista harðlega fyrir að ráðast gegn sér og sakað Aldísi Schram, dóttur sína, um að bera ábyrgð á öllum ásökunum í hans garð.
