Brynjar Níelsson, aðstoðarmaður Dómsmálaráðherra, segir í Sprengisandi á Bylgjunni í dag að vegið hafi verið að störfum lögreglu í máli blaðamannanna fjögurra sem boðaðir voru í skýrslutöku með réttarstöðu sakbornings.
Samkvæmt Brynjari hefur umræðan verið á rangan veg vegna málsins og heldur því fram að aðilar að málinu skilji ekki hvernig lögreglumál gangi fyrir sig. Hann segir eðlilegt að lögregla gefi ekki upp allar upplýsingar um meint afbrot svo snemma í rannsókn.
„Þetta eru bara leikreglur við rannsóknir mála,“ segir Brynjar um hvers vegna blaðamennirnir fjórir hafa fengið réttarstöðu sakbornings „Svo allt í einu þegar kemur að einhverjum fjölmiðlamönnum þá er allt komið á annan enda í samfélaginu, ég skil það ekki.“
Með Brynjari var Jón Trausti Reynisson annar ritstjóri Stundarinnar. Hann segir Brynjar og flokksfélaga hans ekki vera að taka tillit til stærra samhengis í málinu.
Jón segir óviðeigandi að Bjarni Benediktsson, formaður Sjálfstæðisflokksins og fjármálaráðherra, skuli taka afstöðu í málinu. Þá svarar Brynjar að hann sé ekki að taka afstöðu. „Hann er bara að reyna að kenna ykkur og segja ykkur til hvernig þessi mál ganga fyrir sig,“ segir Brynjar.
Þá er Kristjáni Kristjánssyni þáttarstjórnanda Sprengisands ekki skemmt. „Ekki tala svona niður til okkar,“ segir Kristján. „Ekki gera það.“
Hægt er að hlusta á samtalið í heild sinni á vefsíðu Bylgjunnar.
