Brynjar íhugar að hætta við að hætta í stjórnmálum

Brynjar Níels­son, þing­maður Sjálf­stæðis­flokksins, viður­kennir að hann í­hugi nú al­var­lega að hætta við að hætta. Þetta kemur fram í hlað­varps­þættinum Ein Pæling með Þór­arni Hjartar­syni enfrétt um málið hefur þegar birst á vef Fréttablaðsins.

Brynjar lenti í fimmta sæti í próf­kjöri Sjálf­stæðis­flokksins í Reykja­vík síðustu helgi. Það var lakari árangur en hann stefndi að og sagðist Brynjar ekki ætla að þiggja sætið í kjöl­farið.

Í þættinum segir Brynjar að sér líði afar vel, viku eftir próf­kjör. „Próf­kjörið búið og allt þetta vesen í kringum það. Þingið að klárast og maður að komast í sumar­frí. Manni getur ekki liðið betur.“

Ertu alveg hundrað á því að vera hættur? spyr Þórarinn

„Heyrðu, ég var það. Ég var það og var búinn að hugsa lengi fyrir próf­kjörið, ég sá alveg fyrir hvernig þetta færi þegar öll þessi smölun yrði. Þá átti ég aldrei séns í raun og veru ofar en fimmta. Vegna þess að odd­vita­bar­áttan tók með sér hliðar­fólk,“ segir Brynjar.

Hann segir að hann hafi þá hugsað að flokkurinn væri að veðja á nýtt fólk. „Þannig mér fannst þetta bara liggja í augum uppi að ég væri langt frá mark­miðunum, að kveðja bara,“ segir Brynjar.

Hann segir stuðnings­menn sína ekki hafa litið þannig á. „Þannig það er búið að leggja mjög mikið að mér. Slík þyngsli að ég er orðinn boginn í baki.“

Brynjar segist þó ekki hafa tekið endan­lega á­kvörðun. „Það eina sem ég lofa fólki er að ég ætla þá bara að í­huga það hvort það sé á­stæða til að endur­skoða og ég ætla bara að liggja á því í ró­leg­heitum og sjá hvernig málin þróast. Sjá hvernig málin þróast í kosningum nú í kraganum og svo er norð­vestur eftir. Þannig ég ætla bara að bíða ró­legur.“

Hann segist hins­vegar vera undrandi á við­brögðum við fyrri á­kvörðun sinni um að hætta. „Það er að segja hvað það hefur verið þrýst á mig og úti um allt land. Um að halda á­fram og það er eins og ein­hverjum þyki ég mikil­vægur enn­þá,“ segir Brynjar og bætir við:

„Þannig ég eigin­lega neyðist til að alla­vega lofa því að í­huga hvort það sé á­stæða til að endur­skoða þetta.“

Þannig að þú ert að vísa til þess að þiggja fimmta sætið?

„Já. Eða ég meina, það er auð­vitað getur verið gaman að taka bar­áttu,“ svarar Brynjar en fimmta sætið í próf­kjörinu gæti verið bar­áttu­sæti í öðru hvoru Reykja­víkur­kjör­dæmanna. „Ég held að Sjálf­stæðis­flokkurinn eigi alveg gífur­leg tæki­færi í kosningunum í haust. Við stöndum frammi fyrir því að endur­reisa at­vinnu­lífið og ég bara hef ekki trú á því að kjós­endur Reykja­víkur trúi því að Reykja­víkur­módelið geti það.“