„Umræðan á íslenskum vinnumarkaði snýst sífellt meira um framleiðni, þ.e. afköst á hverja vinnustund, og er framleiðniaukning ein af forsendum styttingar vinnuvikunnar. En eins og afköst geta aukist á hverja vinnustund, þá geta þau dregist saman. Því höfum við fengist að kynnast síðustu daga á Alþingi, þar sem fámennur hópur þingmanna hefur tekið afgreiðslu þingmála í gíslingu með málþófi.“
Þetta skrifar Bryndís Haraldsdóttir, þingmaður Sjálfstæðisflokksins í aðsendri grein er nefnist „Málþófið er séríslenskt“ í Fréttablaðinu í dag. Vísar hún þar til þingmanna Miðflokksins, sem hafa haldið uppi málþófi vegna andstöðu sinnar við fyrirhugaða innleiðingu þriðja orkupakkans nánast sleitulaust frá því á mánudaginn í síðustu viku. Þingfundi var til að mynda slitið klukkan sex í morgun eftir 15 klukkustunda málþóf Miðflokksmanna.
Bryndís segir ekkert í þingsköpum sem banni þingmönnum að flytja sömu ræðuna tvisvar, „eða í tugi skipta, sé út í það farið. Málfrelsi þingmanna er mikilvægt og er það sérstaklega varið í flestum þjóðþingum heims. En málþóf á ekkert skylt við málfrelsi eða lýðræði, og þekkist nánast hvergi utan Íslands. Málþóf er séríslenskt fyrirbrigði.“
Hún segir Alþingi engan venjulegan vinnustað. „En vinnustaður er hann engu að síður, þar sem vanda þarf mjög til verka til að tryggja góða lagasetningu. Þegar andstæð sjónarmið hafa komið fram í þingsal er nauðsynlegt að leiða mál til lykta, ýmist með málamiðlunum eða með atkvæðagreiðslum þar sem hreinn meirihluti ræður. Hvort sem þingmenn verða undir eða yfir í einstaka málum er óumdeilt að þetta er skilvirk og sanngjörn aðferð til að komast að niðurstöðu.“
„Daga og nætur eru þingfundirnir undirlagðir af ræðum þingmanna úr einum þingflokki þar sem hver þingmaðurinn fer í ræðustól á fætur öðrum og samflokksþingmennirnir tínast í andsvör við þann fyrri. Að ógleymdu hólinu hvers til annars, það er gott að fá klapp á bakið,“ segir Bryndís.
Hún bendir á heimild forseta Alþingis til þess að takmarka umræður. „Þrátt fyrir að túlka megi þingsköp, sem skapa rammann um hvernig þinghaldi skuli háttað, með þeim hætti að þingmönnum sé frjálst að halda uppi umræðu endalaust, þá er þar kveðið skýrt á um að andsvör séu aðeins heimiluð með leyfi forseta. Þá er einnig að finna heimild í 71. gr. þingskapalaga til þess að takmarka umræður.“
„Ég tel rétt og eðlilegt að þingheimur hugi að þessum heimildum til framtíðar. Núverandi fyrirkomulag, þar sem fámennur hópur stjórnarandstæðinga getur tekið þingið í gíslingu, gengur ekki til framtíðar,“ segir Bryndís að lokum.
Á fimmta hundrað mála bíða afgreiðslu
Í gær greindi Fréttablaðið frá því að á fimmta hundrað mála bíði afgreiðslu þingsins en samkvæmt starfsáætlun Alþingis eru aðeins fjórir þingfundardagar eftir þar til þingið fer í sumarfrí þann 5. júní. Alls bíður 71 lagafrumvarp nú fyrstu umræðu í þinginu og tíu önnur bíða annarrar umræðu. 105 lagafrumvörp eru í meðförum þingnefnda og 113 þingsályktunartillögur bíða afgreiðslu. Þá eiga ráðherrar eftir að svara 142 fyrirspurnum þingmanna.
Þingstörf hafa nú þegar riðlast umtalsvert vegna málþófs þingmanna Miðflokksins og ljóst má þykja að ekki náist að afgreiða öll mál fyrir sumarfrí.
