Bryggjan er nýr þáttur á Hringbraut um fjölbreyttan heim sjávarútvegsins á Íslandi og hefur göngu sína á mánudagskvöldið 14.nóvember.
Þátturinn verður á dagskrá Hringbraut öll mánudagskvöld kl. 21.30 og er í umsjón Lindu Blöndal, Sölva Tryggvasonar, Friðþjófs Helgasonar kvikmyndagerðarmanns, Hauks Sigurbjörnssonar tökumanns og Sverris Sigfússonar, tæknistjóra Hringbrautar.
Rætt verður við fólkið sem nýtir verðmætin úr sjónum bæði fyrr og nú. Nýsköpunin verði skoðuð og fjallað um tengsl Íslendinga við hafið í gegnum tíðina.
Nýjar sögur og gamlar verða sagðar sem varpa ljósi á mikilvægasta atvinnuveg þjóðarinnar í gegnum árin. Tökur hafa staðið yfir síðustu daga og undirbúningur frá því snemma í haust. Viðmælendur verða bæði af landsbyggðinni sem og af höfuðborgarsvæðinu, en sem dæmi má nefna að í fyrsta þætti Bryggjunnar verður fiskvinnslan Visir í Grindavík sótt heim. Þá verður rætt við forsvarsmenn SFS og Sjávarklasans.
Bryggjan er eitt stærsta framleiðsluverkefnið sem Hringbraut hefur ráðist í til þessa og eini sjónvarpsþátturinn á Íslandi sem helgar sig samtali um sjávarútveginn.
