Greinargerð sem er ætlað að skoða kosti þess að færa staðartíma nær sólartíma miðað við hnattræna legu landsins hefur verið birt í samráðsgátt stjórnvalda til opins samráðs við almenning. Greinargerðin ber heitið „Staðartími á Íslandi – stöðumat og tillögur“ og var unnin í forsætisráðuneytinu. Fréttablaðið.is greinir frá.
Í greinargerðinni leggur forsætisráðuneytið til þrjá valkosti. Sá fyrsti er óbreytt ástand en að fólk verði frætt um gagnsemi þess að ganga fyrr til náða. Annar valkostur er að klukkunni verði seinkað um eina klukkustund í samræmi við hnattræna legu landsins og þriðji valkosturinn er að klukkan verði óbreytt en að skólar og jafnvel fyrirtæki og stofnanir hefji starfsemi sína seinna á morgnana. Samráðstími fyrir almenning verður tveir mánuðir
Í frétt Fréttablaðins kemur fram að rannsóknir hafi sýnt að nætursvefn Íslendinga sé almennt of stuttur og að slíkt geti verið heilsuspillandi, haft áhrif á námsárangur og framleiðni í atvinnulífinu. Sérstaklega er þetta áhyggjuefni vegna barna og ungmenna. Ein líkleg skýring sé að klukkan sé ekki í samræmi við hnattræna legu landsins.
RÚV.is greinir frá því að ákveðin þáttaskil hafi orðið í umræðunni þegar hópur vísindamanna fékk Nóbelsverðlaunin á síðasta ári fyrir rannsóknir á erfða-og sameindalíffræði dægurklukkunnar. Í greinargerðinni á samráðsgátt stjórnvalda sé einmitt vitnað til þessarar rannsóknar þar sem skyggnst var inn í gangverk lífsklukkunnar.
Í samtali við RÚV.is segist Katrín Jakobsdóttir forsætisráðherra hafa verið íhaldssöm þegar kom að umræðunni um breytingu klukkunnar. Nú hafi hún hins vegar kynnt sér rannsóknir um áhrif svefns á líðan fólks og segir að ekki sé hægt að líta framhjá svefnlyfjanotkun Íslendinga, sem samkvæmt nýlegri úttekt landlæknis eru mun meira notuð hérlendis en á hinum Norðurlöndunum. Katrín segist þó ekki hafa tekið afstöðu til valkostanna þriggja. „Nei, ég ligg undir feldi“, segir Katrín við RÚV.is.
