Breyta þarf gjaldtöku vegna fjölgunar rafbíla

Hringbraut skrifar

28. september 2018 kl. 12:20

Fréttir & pistlar

Sigurður Ingi Jóhannsson, samgöngu- og sveitarstjórnarráðherra, segist gera sér grein fyrir því að það verði alltaf einhverjir ósáttir við samgönguáætlun og vilji meira fjármagn til nýframkvæmda. Hann telur þó að mikilvægum áföngum verði náð á næstu árum.

Þetta kom fram í viðtali Þórðar Snæs Júlíusson, ritstjóra Kjarnans, við Sigurð Inga í þættinum 21 á Hringbraut sem sýndur var miðvikudaginn 26.sept.

Sigurður Ingi minnti einnig á starfshóp sem sé að störfum sem hefur það hlutverk að skoða gjaldtöku í vegakerfinu. Það séu verkefni í samgönguáætlun sem eru kannski ekki fyrirhuguð á allra næstu árum sem hægt væri að taka út úr henni og framkvæma með gjaldtöku.

Ráðherrann ræddi einnig þá stöðu sem breyting á bílaflota þjóðarinnar mun skapa varðandi tekjuöflun ríkisins til samgönguverkefna

Peningar sem fást í ríkiskassann vegna eldsneytisgjalda muni fara minnkandi á næstu árum samhliða fjölgun rafbíla og annarra bíla sem ganga fyrir umhverfisvænni orkugjöfum. „Þeir þurfa þá að greiða fyrir notkun sína af vegakerfinu. Og þess vegna erum við að horfa á breytingu á gjaldtökunni. Það er orðað í samgönguáætluninni.“

Í þættinum ræðir Sigurður Ingi einnig ítarlega um aðra þætti samgönguáætlunar, borgarlínu og framtíðaráform um almenningssamgöngur á höfuðborgarsvæðinu, stöðu flugfélaganna á Íslandi, þjóðhagslega mikilvæg fyrirtæki og ríkisstjórnarsamstarfið.

Nánar á www.kjarninn.is