Þann 29. mars næstkomandi er fyrirhugað að Bretland gangi úr Evrópusambandinu, en óvissa ríkir um hvort útgöngusamningur Bretlands og Evrópusambandsins verði samþykktur. Fari svo að Bretland yfirgefi ESB án samnings mun Bretland teljast sem þriðja ríki samkvæmt þeim reglum EES samningsins um matvælaöryggi sem gilda um inn- og útflutning matvæla frá Íslandi. Frá þessu er greint í frétt Matvælastofnunar.
Í fréttinni segir að matvæli sem framleidd eru í ESB/EES ríkjum og í samræmi við matvælalöggjöf ESB séu í frjálsu flæði innan innri markaðarins. Í þessu felist að ekki er þörf á vottun yfirvalda vegna útflutnings matvæla (dýraafurða) frá Íslandi til annarra ríkja innan ESB/EES. Né heldur er þörf á opinberu heilbrigðisvottorði með dýraafurðum sem fluttar eru til Íslands frá þessum sömu ríkjum.
Þrátt fyrir þetta gilda ströng skilyrði um innflutning matvæla frá þriðju ríkjum, þ.e. ríkjum sem ekki eru innan EES. Slíkum matvælum, þ.e. dýraafurðum og öðrum tilteknum vörum skal fylgja opinbert heilbrigðisvottorð og skulu þær skráðar í sérstakt skráningarkerfi (Traces). Auk þess má eingöngu flytja þær inn um landamærastöðvar þar sem innflutningseftirlit fer fram.
Vegna þessa hefur Evrópusambandið birt á vef sínum ýmsar leiðbeiningar til hagsmunaaðila, m.a. hvað varðar innflutning dýraafurða frá Bretlandi (sem þriðja ríki) til ríkja innan ESB/EES. Í undirbúningi er svo að opna 18 nýjar landamærastöðvar á meginlandi Evrópu til að mæta aukinni þörf fyrir landamæraeftirlit.
Hvað útflutning matvæla frá Íslandi til Bretlands varðar hafa bresk stjórnvöld gefið til kynna að ekki verði gerð krafa um heilbrigðisvottorð frá ESB/EES ríkjum í a.m.k. 6 mánuði eftir útgöngu. Upplýsingar hafa verið birtar á vef breskra stjórnvalda og er nánari leiðbeininga að vænta.
