Fullveldið er hjá breska þinginu, ekki bresku þjóðinni, segir Eiríkur Bergmann, stjórnmálafræðingur í viðtali á Hringbraut í kvöld. Öll teikn eru á lofti um að Bretar reyni nú að snúa við á leiðinni út úr Evrópusambandinu og séu að draga í land með að yfirgefa ESB.
Skoskir þingmenn ekki fulltrúar Breta
Breska þingið hefur valdið hjá sér til að ákveða hvort að 50.grein Evrópusáttmálans, sem fjallar um útgöngu úr bandalaginu, verði virk. Til þess þarf lagabreytingu og vilja þingsins, segir Eiríkur. Þjóðaratkvæðagreiðslan er ekki bindandi og þar liggur ekki ákvörðunarvaldið. Skotar sem vilja vera í sambandinu hafa verið taldir af sumum geta haft neitunarvald, hafni skoska þingið að samþykkja útgöngu. Eiríkur sagir að Skotar hafi ekki þetta vald. Hins vegar líti þingmenn Skotlands á breska þinginu sig sem fulltrúa aðildarsinna þar sem meirihlutinn í Skotlandi kaus áframhaldandi veru í ESB. Þeir munu telja sig bundna hug Skota en ekki Bretlands í heild. Flækjustigið er því nokkuð, bendir Eiríkur á.
Eiríkur Bergmann, stjórnmálafræðingur bendir á að líkt og Bretland sé danska konungsríkið ekki bara Danmörk heldur líka Grænland og Færeyjar. England gæti þannig verið utan ESB en Skotland og Norður Írland innan þess. Þannig væri dæmið eins og „Danmörk á hvolfi“, sagði Eiríkur og sagði að Frakkar og Þjóðverjar gráti það „þurrum tárum“ að Bretar yfirgefi sambandið enda hafi þeir dregið lappirnar í stórum málum sem þróa sambandið áfram, svo sem fengið undanþágur frá Evruupptöku, eru ekki í Schengen svo eitthvað sé nefnt.
Engar áætlanir til
„Mér sýnist bæði þeir sem töluðu fyrir aðild í Bretlandi og þeir sem hvöttu til útgöngu séu í álíka miklu sjokki“, sagaði Eríkur og benti á þá staðreynd að Bretar virðast ekki hafa haft neinar tilbúnar áætlanir eftir því hvernig kosningin færi. „Það eru engin plön, sem er ótrúlegt“.
Brexit – eða eins og kosningin um útgöngu Breta úr ESB er nefnd - hefur hrint af stað atburðarrás í Evrópus sem enginn sér fyrir hvernig fer.
Úrslit þjóðaratkvæðagreiðslunnar Í Bretlandi, meðal Englendinga, Skota og Norður-Íra, varpaði ljósi á klofning meðal Englendinga gagnvart til dæmis innflytjendamálum.
Ein afleiðingin er að virði breskra banka hefur fallið og pundið líka. Virði Barclays og Royal Bank of Scotland hefur fallið um 30 prósent. Fjármálafyrirtæki í Englandi segjast mörg flytja starfsemi sína úr landi. Hlutabréf í Evrópskum bönkum hefur líka fallið eða um rúmlega fimmtung.
En nú er talað um Frexit, sem er heitið á mögulegri útgöngu Frakka líka úr sambandinu og Nexit, sem er heitið yfir holland og mögulega útgöngu. Orðaleikurinn verður svolítið skondinn þegar Svíþjóð á í hlut, en þá myndi útgangan kallas Sexit.
