Breki: „dágóð búbót fyrir hinn almenna neytanda“

„Það mun­ar um minna. 0,5 prósent vaxta­lækk­un á hverja millj­ón eru 5.000 krón­ur á ári. Þeir sem skulda þrjá­tíu millj­ón­ir til dæm­is borga þá 150.000 krón­um minna af vöxt­um á ári við þess­ar breyt­ing­ar. Það er dágóð bú­bót fyr­ir hinn al­menna neyt­anda.“

Þetta segir Breki Karlsson, formaður Neytendasamtakanna, í samtali við Morgunblaðið í dag. Fyrir tæpum tveimur vikum tilkynnti Seðlabankinn að hann myndi lækka vexti bankans um 0,5 prósent. Meginvextir bankans, vextir á sjö daga bundnum innlánum, eru því nú 4 prósent.

Í kjölfarið hafa til að mynda Landsbankinn og Auður, fjármálaþjónusta á vegum Kviku banka, og Arion banki tilkynnt um lækkun á vöxtum sínum.

Lands­bank­inn til­kynnti á föstudag að bæði inn­láns- og út­lánsvext­ir yrðu lækkaðir á nýrri vaxtatöflu sem tók gildi um helgina. Fast­ir vext­ir óverðtryggðra íbúðalána til 60 mánaða voru lækkaðir um 0,50 pró­sentu­stig og sömu vext­ir til 36 mánaða um 0,30 pró­sentu­stig. Vext­ir á hliðstæðum verðtryggðum lán­um lækkuðu um 0,35 pró­sentu­stig. Á sama tíma lækkuðu breytileg­ir inn­lánsvext­ir um 0,10-0,50 í flest­um til­vik­um, en sum­ir þeirra standa í stað.

Á sama tíma lækkaði Auður sína inn­lánsvexti úr 4,0 prósent í 3,5 prósent og Ari­on banki gerði það sömuleiðis.

Íslands­banki hefur ekki ennþá tilkynnt um lækkun á sínum vöxtum. Breki telur þó líklegt að hann muni gera það, enda spurn­ing um að bjóða viðskipta­vin­um sínum sem best kjör.